Tuid ki paitbah ha ka jingwan u bah A.L Hek ban ïakynduh ïa ki nongïalam ka BJP ha Nongstoiñ

Nongstoiñ, Risaw 24: Kumba ka long mynta ha Nongstoiñ Constituency ki party ki bym pat don ïa u kyrtong na ka bynta ka election 2023 ki dei satang ka BJP. Hynrei wat la ka BJP kam pat lah ban sei ïa u kyrtong haduh mynta, hynrei mynta ka lah sngi u blei ka 24 tarik Risaw u bah Alexander Laloo Hek Chairman ka Central monitoring Committee jong ka BJP Meghalaya ba la synarn lang da u bah W.Marbañiang u ba peit ïa ka BJP West Khasi Hills, u bad David Kharsati vice Chairman ka Committee ki la wan sha Nongstoiñ ban ïakynduh ïa ki nongïalam bad ki nongkyrshan jong ka party.
Ha kane ka sngi la pynlong ïa ka jingïalang ha ka ophis treikam jong ka party ha Upper New Nongstoiñ, ha kaba la ïadon lang da u Francis Pondit R.Sangma MLA ba rim ka Mawshynhrut u ba la wan khnang ban pynïasoh sha ka party bad u ba la pynthikna ruh ba un aplai ïa ka tiket na ka Rambrai Jyrngam Constituency. Nangta u bah Spasterlin Nongrem u ba dei u Organiser jong ka party ha Rambrai Jyrngam, ki nongkitkam ba hakhmat bad ki nongkyrshan napoh jong ka District bad ki paitbah nongkyrshan. Ha katei ka jingïalang la ïoh ban ïaphylliew jingmut kumno yn leh ha kane ka election ka ban long ha u snem ban wan.
U bah A.L.Hek haba ïakren bad u nongthoh khubor hadien ba la wai ka jingïalang, u la ong ba mynta ka sngi ka dei ka sien ba nyngkong ba da ki spah ngut ki paitbah ki la wan ban ïadon ryngkat ha ka jingïalang. Haba kylli pat kiei ki kyrtong kiba ka party ka thmu ban pynïaleh na ki lai tylli ki Constituency ha West Khasi Hills, u bah Hek u la ong ba haduh mynta ka party kam pat khot application bad lada jia ba ki don tang katto kane ngut ne bun ngut kiba aplai, ka party ka pdiang beit hynrei ban ai ïa ka tiket ka shong ha ka Central Executive Committee bad ka jingmynjur jong ki bor ba halor.
Haba kylli pat la ka party kan pynïaleh na baroh hynriew phew tylli ki Constituency ne kan pynïaleh tang katto katne tylli, u la ong ba kata ka shong ha ka jingibit jong ki bor ba halor la kin pynïaleh ne em. Nalor kata u bah Hek u la ong ruh ba kumba ka long mynta ka party ka la ïoh mynsiem ha baroh kawei ka jylla bad ha man la ki Constituency ka party ka la suhthied bha. U la ong ruh ba ha Garo Hills lei lei ka party ka don ka jingkyrmen kaba skhem ba kan jop bun ngut hynrei kiba la thikna ki dei na ki saw tylli ki constituency.