Lait thaw na ka jingjia ba sngewsih ki riewngeit ba thmu leit jingïaseng sha Umsohlait

Shillong, Risaw, 23: Kawei ka bos kaba don ïa u nombar ML05-0834 kaba la niah da u Bah Pynïohnam Nongdhar kaba mih na Laitkor,East Khasi Hills District bad kaba dang thmu ban leit sha ka shnong Umsohlait, Ri-Dhoi District ka la leit tynrah ïa ka jingker nar ynda poi ha Dhankheti mar pyrshah bad ka Petrol Pump. Kane ka la jia ha ka step sngi u Blei na ka daw ka jingbym treikam bha u streering jong ka kali.
Kane ka Bos ka dei kaba kit ïa ki riewngeit ka Balang Katholik na Laitkor Parish kiba thmu ban leit ïashim bynta ha ka Proseshon Maria kaba long ha Umsohlait Parish ha kane ka sngi.
Donbok ba ka dei ka sngi u Blei namarba ki duna bha ki kali kiba kiew naduh bad kiba hiar naneng jong surok ha kaba kam shym la don kano kano ka jingjia kaba sngewsih.
Ki Pulit pynïaid kali kiba la wan poi ha kane ka jaka ki la telephone marmar ïa ki kali Ambulance ban wan kit sha Hospital, ïa ki katto katne kiba la ud shitom khatam ïa ki longkmie bad ki longkpa kiba la kham heh ka rta.
Ha kane ka jingjia, la lap ba ka bynta ba shakhmat jong kane ka Bos ka la julor bha. Tang hadien katto katne por, ki Pulit ki la wan khwai noh ïa kane ka Bos khnang ban pyllait ïa ka jingdheng kali ha kane ka surok Shillong-Jowai.
U Bah Blashan Kharbyngar uba shong ha kane ka Bos u la ïathuh ba ka jingleit tynrah jong kane ka Bos ïa ka jingker nar ha Dhankheti ka dei hadien ba u nongniah um lah shuh ban leh eiei ïa u Streering jong ka kali kaba la thud katba dang ïaid ha lynti.
“Ngi sngewnguh ïa u Blei ba U la pyllait ïa ngi na ka jingmynsaw hynrei ki don katto katne kiba shu pang ka met ka phad na kane ka jingjia,” la ong u Bah Blashan.
U la ïathuh ba ha kane ka Bos ki nongleit jingïaseng ki kynthup ïa ki longkmie, ki longkpa bad ki samla.