Pynïoh u Bah Sanbor da ka Children and Greenary Park ha Madan Laban ba kot 55 lak tam

Shillong, Risaw 23: U MLA jong ka South Shillong Constituency u Bah Sanbor Shullai uba long ruh u Myntri jong ka sorkar jylla ha ka sngi Saitjaiñ u la plie paidbah ïa ka Children Green Spaces Park Cum Play Field ha Madan Laban ïa kaba u la pynïoh na ka skhim Atal Mission For Rejuvenation And Urban Transformation(AMRUT) kaba ka jinglut ka long kumba 55,35,000 tyngka.
“Ka jingbuh ïa kane ka park ki khynnah rit ka thong ka long ba ki heprit kin ïoh lad ban lehkai myllen bad ban muja ha ki sawkun ba tawiar da ki dieng bad ka khlaw” u la ong ha ka por ba khap ribon ïa kane ka park.
U Bah Sanbor u la ong ba hashuwa ban plie ïa kane ka jaka lehkai khynnah ha Madan Laban u la dep ban plie shuwa ïa kawei pat ka jaka lehkai khynnah rit kaba don ha Lumparing.
Ha kane ka sngi u Bah Sanbor u la aiti ruh ïa u shabi sha u Rangbah shong u Bah Ioster Sunn kum ka dak ba ka shnong ka dei ka nongpeit nongsumar ïa kane ka jaka.