Ban bud ïa ki dienjat ki longshuwa shimkhia ka KSU Nongtyngur ban pynbha ïa ki jingkieng jri

Pynursla, Risaw 23: Ka Khasi Students’ Union (KSU) Nongtyngur Unit ryngkat ka jingïatreilang bad ka shnong, ha ka sngi U Blei ka la pynbha bad pynwan dur ïa ka jingkieng jri kaba don ha Nongtyngur, khnang ban wanrah ïa ki jingmyntoi bad jingitynnad bad ban pynneh kyrpang ruh ïa ki matti ba lah prat lynti da ki longshuwa manshuwa naduh mynhyndai.
“Ka sienjam ba ka Seng KSU Nongtyngur Unit ka shimti ban pynbha bad pyn janai ïa katei ka jingkieng jri kadei kum shi bynta ban ïada na ka jingshah pynjot pynjulor bad pynsniew dur ha ki briew ïa katei ka jingkieng diengjri bad nabynta ban wanrah ruh ïa ki jingïadei paralok kaba jan bad ka mei-ramew,” ong ka kyrwoh na u Samla Melajied Khongbuh General Secretary ka seng.
Ha shuwa ba ka seng kan shimti ban maramot ïa kitei ki jingkieng diengjri na ka liang kiba bun ki briew ki lah pom dusmon bad bret pathar ïaki jaboh jabaiñ ha katei ka jaka riat kaba don ka diengjri hynrei kaba sngewkmen shibun ba naduh ba ka seng ka shimti hi ban pynbha bad sumar sukher bha kumta ki nongshnong ruh ki lah sdang ban sngewthuh bad ymdon shuh kiba wan pynjot bad pynsniewdur ïa katei ka jingkieng diengjri kaba lah maramot bad pynwandur da ka seng KSU Nongtyngur Unit ong ka kyrwoh na ka seng.
“Ban shu kyrtiang dien, ki jingkieng diengjri ki dei shisha ki matti ki longshuwa jong ngi kiba dang sahnam haduh kine ki sngi, ki jingkieng jri kiba kham pawnam hapoh ka Bri u Hynñiewtrep ki long ka jingkieng diengjri ha Nongriat, Mawlynnong-Nohwet, Kudengrim, Mawkyrnot bad kiwei de kiba ngim lah shuh ban jer kyrteng. Kine ki dei ki dak ki shin kiba pynpaw shai kdar ba u Khasi hyndai u dei u jaitbynriew uba ïohi jngai bad pyrkhat maïan bha ïa ka imlang sahlang, ka mei mariang bad khamtam ïa ka lawei ki longdien ki ban sa wan. Kumta lada kum ka jaitbynriew ngin ïai buddien ban pynjanai ïa ki dienjat ki longshuwa khlem pep ka jaitbynriew kan sa long kaba laitluid na ki jingjot ki ba ap ha ka imlang sahlang bad ka ri ka jaitbynriew jongngi” pynkut ka kyrwoh.