Dap 100 snem ka jingwan bet symbai jingngeit ki mishoneri Salesian ha NE

Shillong, Risaw, 19: Lai snem kynthih ki khun mynsiem jong u Don Bosco ki la pynkhreh ban rakhe ïa ka jingdap 100 snem ka jingwan iuhkjat jong ki mishoneri ka jingïasyllok Salesian na ka ri Italy ha ka 13 tarik, Kyllalyngkot, 1922 ha nongbah Shillong ban bet ïa u symbai jingngeit ha ka thaiñ Shatei Lammihngi.
Ka jingïasyllok Salesian kan sa pynkut ïa kane ka jingrakhe ha ka 30 tarik mynta u bnai ha Cathedral Parish, Laitumkhrah, Shillong ha kaba u Apostolic Nuncio uba peit ïa ka ri India bad ri Nepal u Most Rev. Leopoldo Girelli un sa long u Kongsan ha ryngkat ka jingïadonlang jong u Rector Major ka jingïasyllok Salesian u Rev. Fr. Angel Fernandez.
Ha ka jingïakren bad ki lad pathai khubor ha ka sngi Balang, u Archbishop ka Shillong Archdiocese u Most Rev. Victor Lyngdoh u la khot bad wer ïa ki paidriewngeit jong ka Jyllaniam Shillong, Nongstoiñ bad Jowai ban ïashim bynta lang ha kane ka sngi ba ka jingïasyllok Salesian kan sa rakhe ïa kane ka sngi bakhraw.
U Archbishop u la khot bad wer ïa ki paid u Blei na ki lai tylli ki Diocese ban ïashim bynta ha ka proseshon Iukharis jong ka Shillong Archdiocese ka ban sa long ha ka 13 tarik u bnai Naiwieng.
U Provincial jong ka Salesian Shillong Province u Rev. Fr. Paul Olphindro Lyngkot u la ïathuh ruh ba kan sa don ka jingïakynduh ba kyrpang jong ki samla Catholic na ki 7 tylli ki jylla jong ka thaiñ Shatei Lammihngi ka ban sa long ha nongbah Shillong.
U Rev. Fr. Lyngkot u la ïathuh ba ka jingpynkhreh ïa kane ka sngi kaba khraw ka long mynta la lai snem kynthih, kata naduh u snem 2019 da kaba pynlong ïa ki prokram bapher bapher kumno ban pynphriang ïa ka Ktien u Blei bad ban pynkhreh ïa ki paidriewngeit ba kin kham tip shuh shuh ïa U Blei.
“Ha ka snem kaba ar, kata ha u 2020, wat hapdeng ka jingwan lynshop jong ka jingpang khlam Covid-19 ngi la pynkhreh ïa ka Youth Ministry khnang ba ki khun samla hapoh ka Balang kin kham ngam jylliew shuh shuh shaphang ka Ktien U Blei. Ngi la pynlong ïa ki jingïathir jingmut bad ki jingphaidien ïa la ka jingim. Ha u snem 2021 la pynkhreh ïa ki kam ba kynja mynsiem da ki khun jong u Don Bosco kaba ki khot ka Salesian Spirituality,” la ïathuh u Provincial.
Haba kylli, u Provicial u la ong, “tang ha Shillong Province, ngi don 42 tylli ki iing ba ngi trei, kata kynthup ïa ka Mizoram, Tripura, Barrack Valley, ka rilum Khasi bad rilum Jaiñtia lait noh ka rilum Garo kaba hap hapoh ka jylli treikam jong ka Guwahati Province.”
U la ïathuh ba ka jingïasyllok Salesian ka la tei hynriew tylli ki Technical School, kata, ka Don Bosco Technical School ha Shillong, ka Don Bosco Tech, Pyndenglawar, Nongstoiñ, ka Bosco Pnar, Jowai, ha Silchar, ha Agartala bad ha Sacred Heart Pisamganj. “Nalor kine, ki don sa ki jaka ai jinghikai kiba rit, kiba ngi buh kum ka thong ban ïarap ïa ki khun samla,” u la bynrap.