Jowai, Risaw 14: U ma Shemhok Garod u MDC ba rim jong ka Nangbah Constituency mynta ka sngi ula pyntikna ïalade ban ïakhun beit ïa kane ka Election MLA 2023 na ka 3-Raliang Constituency.
Ïa kane u ma Garod ula pynbna haka jingkren sha ki lad pathai khubor na nongbah Jowai, ula ong ka jingthmu ban ïakhun ïa kane ka Election ka long hadien ba ula dep ban ïa syllok ïa kiba paidbah nongshong shnong ka 3-Raliang Constituency bad kiba bun na ki don ka mynsiem ban ai jingkyrshan pura ïa u ha kane ka kynti.
Ula pynsngew ruh kum u briew ula ai ka jingshakri ïa ki paidbah la kumba 25 snem mynta, ha ka kam MDC ula ïakhun haduh 5 sien da kaba jop lai sien bad shah rem 2 sien, kum u MDC ha ki por ba jop ula wanrah shibun ki kam pynroi hapoh ka Nangbah Constituency, hynrei kumba long mynta kane ka Constituency kala shah eh beiñ shaba palat ha ki kam pynroi.
Ula kynthoh ruh ïa kane ka sorkar ba ïalam da ka NPP kaba la phil ha baroh ki liang naduh ka pule ka puthi haduh ba la pynlong ïa ki nonghikai ban kin mih da kaba leit thiah sha ki surok, nalor sa ka jingtreikam sa kita ki High Level ban pynïaid ki kam ki jam.
Ha kaba ïadei bad ka Party na ka liang u ma Garod ula pyntip ba u dang ap ïa ka rai na ka UDP, hynrei lada ym ïoh ruh ïa kane ka ticket un long beit uba la pynkhreh ban aireng ha kane ka Election 2023. Da kaba u kyntu kumjuh ïa ki bor pynïaid ka UDP ba kin jurip bniah ïa uno u briew uba dei hok ban ïoh ïa ka ticket.
Halor ki khubor hamsaia sharum shaneng kiba ong ba ïa u ma Shemhok Garod la don kiba pynïeng ban ïakhun ha kane ka Election 2023, hynrei na ka liang jong u ula kyntiat mardor ïa kane da ka u ong ba ka don ka aiñ kaba lah ban pynshitom ïa kino ne kano kiba kren khlem ka nongrim ba shisha.
