Shillong, Risaw : U MLA ka Mawlai u Bah PT Sawkmie ha ka sngi Balang ba la lah u la plie ïa ka kynroh jong ka Balang St. Mark Church, CNI, Mawsiatkhnam kaba ki la ïoh hadien 64 snem naduh ba seng ia ka ha u snem 1958, bad kaba ker ruh kumjuh ïa ka skul balang kaba don markhap bad ka ïingmane kaba la pyntrei da ka tnad PWD, Umsning Division.
Ha kane ka sngi la don lang ki heh PWD, ha ka jingdon ryngkat u rangbah shnong bah Shemphang Wahlang, secretary shnong bah KW Lynrah, bah P Jyrwa, uba dei u Deacon ka balang bad u rangbah dong Pdengshnong, ki nongkitkam shnong, ki nonghikai, ki khynnah skul bad kiwei kiwei.
Ha kane ka sngi u MLA u la sam ruh ïa ki shuki 100 tylli, ki tiar misteri, ka rynda, ka bersha, ki lyngka na ka bynta ka shnong Mawsiat-khnam bad ki pliang na ka bynta ka seng longkmie.
La pyniphuh iphieng ïa kane ka sngi da ka jingrwai bad jingshad ki khynnah jong ki skul kiba don hapoh shnong Mawsiatkhnam.
Haba ai jingkren hashuwa ban plie ïa ka kynroh bah PT Sawkmie u pynpaw ba ka kynroh ka la urlong na ka jingkyrkhu jong U Blei
Haba kren pat ha ka jingïalang u bah PT Sawkmie u pyntip ba ha u bnai Naiwieng un sa pyllait sa ïa ka Power Tiller na ka bynta ki nongrep ban aiti ha ka seng ki nongrep kaba don ha Mawlai kaban pynïaid ïa ka. U pynpaw ba u don ruh ïa ka jingthmu ban pynïoh ïa manla ki shnong kiba don sha ka thaiñ babun ki nongrep.
Ha kane ka sngi la ïoh ruh ïa ka jingkren na u Bah Teibok Kharkongor, secretary ka UDP Mawlai Circle, u bah Wanseng Jyrwa, na u rangbah shnong bah Shemphang Wahlang, u secretary shnong, na bah P. Jyrwa uba pynïaid ïa ka jingïalang bad kiwei kiwei.
Na ka liang u rangbah shnong Mawsiatkhnam u la ai khublei bad pynpaw ka jingsngewnguh ïa U Blei halor ka kynroh bad halor kiwei ki jingai u MLA.
