Da ki projek shna surok ba 8 klur tam wanrah u Bah Banteidor na bynta 6 tylli ki Shnong

Shillong, Risaw, 13: Ka jingangnud da ki phew snem jong ki nongshong shnong na hyniew tylli ki shnong ba kynthup ïa ka Mawsir, Mawdulop, Ksanrngi, Mawlang, Mawjatap bad Siangkhnai ban ïoh ïa ki surok rong kan sa urlong noh shen.
Ïa kane la ïathuh da u MLA jong ka Mawkynrew Constituency u Bah Banteidor Lyngdoh, uba long ruh u Myntri ka Sorkar Jylla ha ka jingïalang plie ïa ki ar tylli mawnongrim kaba la long ha ka shnong Mawsir ha ka sngi Balang ban shna noh ïa ki surok.
Ïa kine ka surok yn siang rong lyngba ka mang tyngka kaba T. 8.10 klur tam na ka RIDF XXVII 2021-2022 bad ban phiah ha ki lai bynta, kata, kawei ka dei na ka bynta ka surok Mawsir-Mawdulop-Ksanrngi bad ar tylli na ka bynta ka surok Mawlang- Mawjatap-Siangkhnai. Ka lynter jong baroh lai tylli kine ki projek surok ka la kynjoh sha ka 6 kilomitar shiteng.
Ha kane ka jingïalang la ïa donlang u Chief Engineer (NH) PWD (Roads), Shillong u GK Marak, u Executive Engineer ka tnat PWD Roads NH Shillong Bypass Division u Bah S Lytep bad ki nongïalam shnong.
Ki nongïalam shnong na kine ki shnong haba kren ha ka jingïalang ki la pyrto ïa ka jingtrei shitom jong u MLA uba la shim khia ban pynurlong ïa ka jingangnud jong ki hadien da ki phew snem. Ki la ong ba kim poi pyrkhat ba u MLA uba sngap jarjar hynrei u pyni pat da ki kam.
“Ngin sa lait na ka sohsat ynda la dep siang rong ïa kine ki surok bad kan pynsuk ha ka leit ka wan ki nongshong shnong,”ki la ong.
U Bah Banteidor haba kren ha ka jingïalang, u la ïathuh ba u la buh hakhmat ïa ka thong naduh mynshwa ban pynkylla dur ïa ka long ka man ki surok ba i sangsot ha ka Constituency.
“Nga la ïaleh shitom bad phi ki paidbah ban pynbiang shwa ïa ki surok kiba kongsan kum na Smit sha Jatah, Syntung, Nongjrong bad Mawlat bad ki la long kiba pynsuk shisha mynta ïa ka leit ka wan”, u la ong.
Haba pynpaw ba ha ki snem kiba ladep ka long ka man jong ki surok kiba kongsan ha ka Constituency ki la long kiba sohsat haduh katta katta ban ïaid ban ïeng, u la ong ba mynta yn phai khmat sha ki surok ki ban pynïasoh sha ki shnong bapher bapher kiba dang sah mynta.
U la ong ba ka surok na Lad Mawkhoh sha Pashang ruh yn sa sdang noh bad ka surok sha Nongryngkoh kaba ym don ba lah mutdur ban ïoh surok pynban mynta ka surok ka la poi haduh khliehshnong.
Halor ka jingshah kynnoh ba u ai surok tang sha ki shnong ba bun Vote, u Bah Banteidor u la ong ba mynta ka sngi ka dei ka jubab ïa ki jingkynnoh baroh.
“Nga ju ïai buh ha jingpyrkhat ba lano ngan ïoh ban phah siang rong ïa ki surok shnong hynrei nga sngap halade bad nga leh da ki kam,” u la ong.