Shillong, Risaw, 09: Ka kurim u Lat ka Jylla u Brigadier (Dr.) B.D. Mishra (Retd.) ka Neelam Misra ha ka jingïakynduh ïa ki heh Ophisar jong ka tnat Textile and Handicrafts, ki nongseng kam bad ki Self Help Group ha Raj Bhavan, Shillong ha ka sngi Thohdieng, ka la kyntu ïa ka Sorkar Jylla ba kan pynshlur ïa ki nongthaiñ jaiñ tynrai.
Ka Misra ka la kyntu ïa ki heh Ophisar jong ka tnat tnat Textile and Handicrafts ba kin ïarap ïa ki kynthei da kaba pynthikna ba dei ban pynneh pynsah ïa ka riti ka dustur kaba la don lypa.
Haba pynpaw ïa ka jingsngewkmen ïa ka jingshimkhia jong ki ophisar ban kyntiew ïa ka thaiñ jaiñ, ka Misra ka la khot bad wer ïa kiba don ha kane ka jingïalang ban shimkhia ruh na ka bynta ban pynïaid iew ïa ki mar rep ba la pynmih na kane ka jylla shabar ka ri India khnang ban kyntiew ïa ka khih ka kamai jong ki kynthei kaba long ruh kum shi bynta ban pynkup bor ïa ki.
Ha kane ka jingïalang la ïashim bynta lang da u Principal Secretary jong ka tnat Textile u Sampath Kumar, u Commission & Secretary jong ka tnat Textile u Bah F.R. Kharkongor, u Director jong ka NIFT, Shillong u Dr. A. Das, ka Deputy Commissioner East Khasi Hills ka Kong Isawanda Laloo bad u Secretary jong ka tnat Textiles u Bah T. Lyngwa, ka Ms. Kari Lombi, kaba dei ka OSD jong u Secretary ka tnat Textile & Handicrafts, ka Sorkar Arunachal Pradesh bad ka Ratan Anya kaba long ka Chairperson jong ka Oju Welfare Association of Arunachal Pradesh.
La pyni ruh ïa ka jinglum jingtip jong ka kam thaiñ jaiñ ha ka jylla Meghalaya bad Arunachal Pradesh.
