Pynkup burom ki bor District ïa ki riewtymmen ba kyrshan ïa ka Riti Synshar Paidbah

Jowai, Risaw 02: Shi bynta na ka jingrakhe ïaka sngi ba kyrpang jong ki riew tymmen ne ka ‘International Day for Older Person’ ha kane ka sngi saitjaiñ ka ophis u Deputy Commissioner (Election), West Jaiñtia Hills kala leit ban pynkup burom ïa riew tymmen kiba la tam ïa ka 80 snem shaneng sha baroh ki Polling Stations kiba don hapoh jong ka District.
Na ka liang ka ophis kala aiti kumjuh ïa ka syrnod ba la issue da ka Election Commission jong ka Ri kum ka dak ban kibok kitrwaing ïa kitei ki riewtymmen kiba don ha kylleng ka District halor ka jingnoh synñiang jong ki sha ka Riti Synshar Paidbah jong ka Ri India kiba la pyndep hok ïa ka kamram ban leit thep vote ha man ki Election, kane ka long ruh shi bynta na ka nuksa kaba bha tam ïa kiwei de.
Ha katei ka sngi la pynkup burom kymjuh ïa ki lai ngut ki riew tymmen kiba la kynjop sha ka 100 snem kiba kynthup ïa u Emmanuel Biam uba don 100 snem uwei na ki ongthep vote ka 19- Mihmyntdu Lumpyrtuh Salini Colony Polling Station hapoh ka 2-Jowai Assembly Constituency bad la pynkup burom da u bah B.S. Sohliya, IAS Deputy Commissioner (Election), West Jaiñtia Hills District.
ïa ka Thyrngai Dhar, kaba 101 snem kaba dei ka nongthep vote na ka 1- Thadbamon (Section No. 3, Lummuriap) Polling Station hapoh ka 4-Mowkaiaw Assembly Constituency da ka kong D.D. Syngai, MCS & ERO ka 4-Mowkaiaw Assembly Constituency. Ïa ka Pherly Dan, kaba don 102 snem ka nongthep vote jong ka 37-Moodop Polling Station hapoh ka 1- Nartiang Assembly Constituency la pynkup burom da u bah W.K. Kharbuli, MCS & AERO jong ka 1-Nartiang Assembly Constituency.
Kiwei de kiba la shah pynkup burom ki kynthup ïa u Dwin Shylla ba la kynjop ïa ka rta ba 85 snem na ka 36 A. Moodop Nartiang ba la aiti ïa ka syrnod da u BLO ma P.R Bareh nalor kiwei de ki riewtymmen kiba la shah pynkum burom hapoh ka District.