Mynta yn aiti ka Sorkar ïa ka Blueprint sha ka HPC, yn ïakynduh biang hadien ka Puja

0

Shillong, Nailur, 29: Ka High Level Committee (HLC) ha ka sngi Palei ka la pyni ïa ka Blueprint sha ki nongïalam jong ka Harijan Panchayat Committee (HPC) hadien ba ka Sorkar Jylla ka la rai ban pynkynriah ïa ki 342 tylli ki longing kiba sah ha Sweeper’s Lane ha Them Iew Mawlong sha ki Quarter jong ka Shillong Municipal Board (SMB) kiba don ha Bishop’s Cotton Road.
Ha kane ka jingïalang, la don lang u Myntri ka tnat Pynroi Sor u Bah Sniawbhalang Dhar bad kiwei kiwei ki heh ophisar na ka tnat Pynroi Sor.
U Chairman jong ka High Level Committee (HLC) u Bah Prestone Tynsong uba long ruh u Symbud Myntri Rangbah ka Jylla ha ka jingïakren bad ki lad pathai khubor hadien ba la wai jingïalang bad ki nongïalam jong ka Harijan Panchayat Committee (HPC) u la ong, ‘kane ka dei ka sien kaba lai kaba ngi la shong jingïalang bad ka Harijan Panchayat Committee. Ngi la pyntip ruh ïa ki ba ka Sorkar la rai ban pynkynriah lut ïa ki 342 tylli ki longiing sha ka Quarter jong ka Shillong Municipal Board (SMB) kaba don ha Bishop’s Cotton Road.”
“Ngi la pyni ruh ha ki ïa ki jingbatai, ïa ki jingdro bad ïa ka Design jong ki iing building ba ki 342 tylli ki longing kin sah ha kane jaka kaba dang hap hapoh ka European Ward katkum ka jingkwah ka jong ki,” ong u Bah Prestone.
Katkum ka jingong jong u Bah Prestone, kane ka jaka ba ka Sorkar kan pynshna ïa ka iing ïa ki 342 tylli ki longing ka dei kaba heh 2.5 akar.
U la pyntip ruh ba ka High Level Committee kan sa aiti ruh ïa ka kopi jong ka Blueprint sha ka Harijan Panchayat Committee lashai ka sngi Thohdieng.
“Ki (Harijan Panchayat Committtee) pynpaw ruh ba tang shu ïoh ïa ka Blueprint kin sa shong paramaki ban ïasyllok bad hadien kata ngi la rai ban ïakynduh biang hadien ka lehniam Puja,” u la ong.
Haba kylli, u Bah Prestone u la ong, hadien ba la pynkynriah lut ïa ki 342 tylli ki longïing na Them Iew Mawlong, ka Sorkar kan sa pynpra lut ïa baroh ki iing tap shiliang bad ïa baroh ki jingtei kiba don ha kane ka jaka bad kynthup ruh wat ïa ka Gurudwara.
U la ong ba katkum ka aiñ jong ka ri, ki iing briew bad ka jaka mane blei kam dei satia ban don ha iew ha hat namarba kane ka jaka ha Them Iew Mawlong ka dei ka jaka iew.
U Secretary jong ka HPC u Gurjit Singh ha ka jingïakren bad ki lad pathai khubor u la ong yn sa lah ban shim ïa ka rai tad ynda la ïoh pdiang ïa ka Blueprint ha ka kti bad ynda la ïasyllok bad kiwei de ki longing kiba sah ha Them Iew Mawlong.
U la ïathuh ruh ba ki phra tylli ki mat ba ka Committee ka la rah hakhmat ka Sorkar kham mynshwa ka la shah kyntait.
“Ka Sorkar ka kwah ban pynsah ha ka ing mala bad ïa kane ngin dang hap ban ïakren shwa bad kiwei de ki longing la ki mynjur neem ïa kane,” u la bynrap.

Leave A Reply

Your email address will not be published.