Da ka Sky Walk ai jingmut u MLA ka North Shillong ban tei ha Khyndai Lad

0

Shillong, Nailur, 29: Kum ka jingbuddien ïa kaba la dep pynsngew hapoh ka Ïingdorbar Thawaiñ ba la donkam ban shna noh da ka Medium Fly Over ne ka Skywalk, u MLA jong ka North Shillong Constituency u la aiti da ka jingthoh hau Myntri ka tnat Pynroi Sor ka Sorkar Jylla u Bah Sniawbhalang Dhar ha ka sngi Baar.
Ha kane ka jingthoh kaba don bad ka jingdro, u Bah Adelbert Nongrum u la ong ba kan long kum shibynta ban ïarap ïa ki paidbah nongleit nongwan kiba ïaid lynti ha Khyndai Lad kaba long ka kad khaii kaba thnem bha da ki nongleit nongwan bad ki nongleit siew leit tda.
“Kan don ka jingitynnat, kan khring ïa ki nongwan jngohkai pyrthei bad kan pynlong ruh ba ki briew kin ïaid na ka jrong bad ki kali kin ym sahkut ha ka dheng kali. Kumba ka long mynta ki kali bad ki briew ki ïaid najuh, ka surok ban rung sha iew Police Bazar ruh la donkam ban khangnoh ïa ka jingshah rung ban ïaid kali, namar ka jingïaid lang ki briew, ki kali bad ka jingdon jong ki briew kiba shongdie jingdie harud surok kan wanrah ïa ka jingmynsaw, mano ban shim ka jingkitkhlieh lada don ki jingjia sngewsih,” ong u Bah Nongrum.
“Kane ka jingai jingmut sha u Myntri ka tnat Pynroi Sor ka long ruh halor ka jingïohi ba kam don shuh ka lad ban pynheh ïa ka surok ha ka jylli jong ka Khyndai Lad kumta donkam ban shna da ka Skywalk kaba lah ban leh lyngba ka skhim Smart City bad ba ki Engineer ne ki riewshemphang (Expert) ki lah ban leh lada mynjur ka tnat Urban Affairs. Ïa ka Skywalk lah ban shna ha ki artylli ki jaka ruh kum na Keating Road sha Khyndai Lad, na Pegasus sha Oakland Road bad na surokbah sha Assembly barim,” ong u MLA.
U la ong ba na ka Skywalk ki paidbah ki lah ban ïaid lynti khlem khuslai shuh bad kane kan wanrah ruh ïa ka jingitynnad jong ka Khyndai Lad.
Ha kaba ïadei bad ka jingpynitynnad ïa ka Khyndai Lad da kaba siang da ki Tiles ha lynti ban rung sha Police Bazar, u MLA u la ong, “namar ka jingshah ban ïaid ki kali na kane ka lynti ïaid briew ka la wanrah ka jingpynjot ïa ki Tiles ha kaba ki don ki jaka ba la sdang long thliew bad ka buh jingma ruh ïa kiba ïaid lynti khamtam ki khynnah skul ba dangrit, kumta dei ban khang noh ka ailad ban ïaid kali na kane ka surok.”

Leave A Reply

Your email address will not be published.