Sei madan ïa ki jingshisha baroh ba dei bad ka Pine Mount, dawa u Bah HM Shangpliang

Shillong, Nailur 29 : U MLA ka Trinamool Congress na Mawsynram, Bah Himalaya M Shangpliang ha ka sngi Palei u la dawa na ka sorkar jylla ba kadei ban sei madan ïa ka kaiphod tohkit bad ïa ki jingshisha baroh kaba ïadei bad ka jingkynnoh ba ka jingdkoh pyntreikam ïa ka skul Pine Mount, kawei na ki skul ba pawnam ha nongbah Shillong.
Haba kren bad ki lad pathai khubor, utei u MLA u la ong, “Nga khmih lynti ba ka jingtohkit kan sei lut kham bniah ki jinglong jingman ba don ha katei ka skul bad ïa ka kaiphod ruh dei ban pynbna paidbah. Ngi dei ban tip hangno don ka jingbakla ha katei ka jaka pule kaba pawnam ha ka jylla, kata ha Pine Mount Shillong.”
U la ïathuh ruh ba ka jingkynnoh ba ka don ka jingdkoh treikam ha katei ka skul ka la poi ruh haduh Iing Dorbar ïa kaba la rah da ki katto katne ki dkhot ha kaba ka la don ruh ka jingïatai kaba sani ïa ki daw kiba pynlong ïa katei ka jaka pule ba kan shah kynthoh kumtei.
“La kular ïangi da u Myntri ka tnad Pule Puthi ba yn sa leh ei ei bad ruh ban shim ïa ki sienjam bad ban pynbeit ïa ki jingbakla, “u la ong da kaba bynrap, “Ngi ïohsngew ruh ba ka don ka jingtohkit bad mynta ka la ïaid shakhmat bad kum shi bynta ka la don ruh ka jingpan jingpynshai sha ki katto katne ki nonghikai.”
Da kaba pynpaw ba ka jingbynniaw kaba hakhmat kadei ïa ki khynnah skul, u Bah Himalaya u ong ruh ba ki samla pule kim dei satia ban long ki sohpdung na ka daw ka jingtohkit bad ki dei ruh ban shah ktah tang na ka daw ba kam don shuh ka jingïatrei lang bad ki nonghikai. Ha kajuh ka por u la buh jingkylli ruh ïa ka sorkar la ka tip neem ba ka principal ka la shim shuti na ka bynta 40 sngi na ka daw ka jingbym don ha ka met kaba koit ba khiah.
“Nga sngewlyngoh ba ka Principal ka la don ha ka shuti na ka bynta 40 sngi na ka daw ka jingshitom, hynrei la ka sorkar ka tip neem ba ka Principal ka shim shuti bad lada ka tip balei pat kam aibor ha ka Vice Principal lane ki nonghikai kiba la kham rim ban peit shipor ïa ki kam jong ka skul kiba hap ban ïaid man ka sngi,” la bynrap shuh shuh u MLA.
U ong ruh ba dei na ka daw bym don kum kitei ki jingbthah na ka liang ka sorkar ba ki sa mih baroh ki jingdkoh treikam namar ym don nongpeit nongkhmih. “La pyntip ruh ïangi ba wat ki jaka leit bar ruh kim long satia kiba biang bad wat ki jaka sah (hostel) ruh kim dei kiba ïahap nalor kiwei kiwei ki ishu,” u la ong.