Byrngem ki 9 shnong ban ujor sha Supreme Court ba shah pynngat sha ka jylla Assam

Nongpoh, Ïaiong 01: Ki paid nong shong shnong jong ki 9 tylli ki shnong ha khappud ka Meghalaya haka thaiñ Maikhubli sa shisien pat mynta ka Sngi Thohdieng da ka mynsiem kaba dum bad ba khia kila mih paidbah biang ban lum da ka jingïalang ban pyrshah halor ka rai jong ka sorkar ban aiti ïa ki 9 tylli ki shnong sha Assam hadien ba ki ar Myntri Rangbah jong ka jylla Meghalaya bad Assam kila dep ban soi ïa ka MoU ha nongbah Delhi. Ki la rai ruh ban ujor sha ka ïing bishar Supreme Court halor kane ka jingrai jongka sorkar Meghalaya ban aiti ïa kine ki shnong sha ka Assam khlem da iamir jingmut shwa bad ki.
Kine ki 9 tylli ki shnong ki kynthup ïa ka Patarkuchi, Pahankhangso, Maikhuli, Umkrem, Nangthymmai, Pillangkata, Yangkhuli, Umlyngka bad Mawiong.
“ Ngi dawa ba ka sorkar Meghalaya ka dei ban bishar bniah biang ïa kane ka soskular bad ban pynhap ïaka pung ha Maikhuli sha Meghalaya. Lada ka sorkar kam lah ban pynkylla ïa ka rai ngim banse ban kiew sha ka ïing bishar Supreme Court” ong u Sunmoon Marak Advisor jongka GSU Pillangkata Regional Committeee
Ki paidbah naka thaiñ Maikhuli bad kine ki shnong ba marjan mynta ka sngi kila buh ruh da ka jingduwai ba kim kwah ban leit sha Assam bad kam dei ka mon ka jong ki hynrei kala dei ka jingbeh jubor jong ka sorkar Meghalaya ïaki da kaba pyn ngat noh sha ka jylla Assam bad buh ïaki hapdeng ka jingdum kaba khraw.
Ki paidbah kila pyrta shla ruh ryngkat ki placard ba lada ka mon jong ki paidbah kam treikam ha katei ka jaka ha kaba ka sorkar kala shu soi kulmar khlem da mir jingmut bad ki paidbah, da kaba pynrem jur ruh ba u Myntri Rangbah ryngkat ki nongmihkhmat ka Jirang Constituency haduh mynta kim pyrwa eiei ban leit peit lane ban leit iuhkjat ha katei ka thaiñ ban tip ïaka jinglong jingman bad ka jingeh ba ki paidbah ki ïakynduh. Lada kitei ki shnong ha katei ka thaiñ yn pynhap noh sha Assam, bad pynpaw ruh ba kane ka jingleh jong ka sorkar halor u pud u sam ka buh ïaki paidbah ba shong ba sah ha katei ka thaiñ hapdeng ka jingdum.
Ka sur kaba shai kala mih ruh ha katei ka sngi naduh ki paidbah bad nongïalam shnong ba ka dei ka history ïaka jylla ba kala lah ban pynbeit ïa u pud u sam haka sien ba nyngkong haki 6 jaka jong ki jaka kajia pud, hynrei ka dei ka jingtim pat ïaki paidbah namar I kumba ka sorkar kam pyrwa eiei ïaka jingsngew jong ki bad pynhap noh ïaki katto katne tylli ki shnong sha Assam, watla ki paidbah ki pyrshah bad kim mon halor katei ka rai kaba long kum ka jingbeh jubor ïaki naka jylla.
Naka liang kiba bun ki nongïalam shnong bad ki riew paidbah kiba la ai jingkren ha katei ka sngi kila pynrem jur ruh ïa ki nongmihkhmat jong ka Jirang naduh u MLA bad MDC kiba la shu set ïala ka shyntur khlem da leit peit lane leit jngoh ïaki paidbah kiba la pypaw ka jingpyrshah halor ka jingshah pynngat noh ki shnong sha Assam khlem ka jingmynjur jong ki watla ka sorkar kala pynshai ba yn pynbeit ïa u pud u sam halor ka jingmynjur bad ka mon jong ki paidbah hynrei da khongpong ki paidbah kila shu kylla langkñia ha katei ka thaiñ.
Ha katei ka jingïalang kaba la long mynta ka sngi kila shim ruh ka rai ba da lei lei kim treh ban ai ïaka jaka jong ki sha Assam bad kum ki paidbah kin pyrshah la ka long ha kano kano ka rukom katba ka sorkar kam pat lah ban pynbeit ïaka jingeh jong ki bad dawa ruh ba u Myntri Rangbah u dei ban leit mih hi sha katei ka jaka ban tip ïaka jinglong jingman bad ka jingeh jong ki paidbah.