ïoh pdiang ka Meghalaya ïa ka nam kum ka jylla ba tbit ban pyntreikam ïa ka skim JJM

Shillong, Nailur 29 : Ka Meghalaya ka la shah jied ban pdiang ïa ka khusnam kaba kyrpang tam namar ka la paw kum kawei na ki jylla kiba tbit tam eh ban pyntreikam ïa ka skim Jal Jeevan Mission ha ka jylla.
Ïa kane la pyntip da u Myntri Rangbah ka Jylla Conrad K Sangma ha ka jingïalang pyllait paidbah ïa ki kor cctv bad kiwei kiwei kaba long ha Mawprem, Shillong West constituency.
“Phin sngewkmen ban tip ba ha ka sngi rakhe ïa ka Gandhi Jayanti kaba dei ka lyngkhuh Sngikha jong u Mahatma Gandhi ka President jong ka Ri kan sa pynkup burom da ka khusnam ba kyrpang ïa ka jylla na bynta ka jingtbit pyntreikam ïa ka JJM,” u la ong.
Nalorkata u Myntri Rangbah u la pyntip ruh ba ka jylla ka la dep ruh ban ïoh bun ki khusnam na bynta ka jingtbit jong ka ban treikam la ka long ha ka liang ka Koit ka Khiah haduh ki kam jngohkai pyrthei.
“Ngi treikam da ka jingïoh jngai ban pynlong ïa ka Meghalaya kum kawei na ki 10 tylli ki jylla ba paw nam ha ka ri India bad ha ki 10 snem ban wan lynga ki sienjam kiba biang bad ki polisi kiba paka ka jylla kan kiew arted ha kiba bun ki liang,” u la ong.
Ha katei ka jingïalang u Myntri Rangbah ryngkat bad u MLA ka thaiñ Bah Mohendro Rapsang ki la pyllait paidbah ruh ïa ka kali kit metïap jong ka Hindu Mission, nangta ïa ki LED Streetlight bad ruh ïa ki kor CCTV ba la pyndait ha katei ka thain.
Ïa kitei ki projek la pyntrei lyngba ka jingbei tyngka na ka Chief Minister’s Special Development Fund. Ha kane ka sngi u Myntri Rangbah u la leit ruh ban kynduh bad leit peit ïa ki khunswet ba peit da ka Hindu Mission.