Ka dei ka kamram ki Liang Pyrshah ban kynthah Sorkar; ong u Myntri Rangbah

Shillong, Nailur 29: U Myntri Rangbah ka jylla u Conrad Sangma ha ka sngi Palei u la ong ba ka jingkynthah jong u National Spoke Person ka All India Trinamoool Congress (AITC) u Saket Gokhale ka dei hok bad ka kamram jong u kum u dkhot ka seng ba don ha ka Liang Pyrshah, hynrei um dei ban shu kynnoh khlem da lah ban kdew ïa ki jingshisha.
U la ong ba kaei kaba u Saket Gokhale u kynnoh ka dei kaba bakla ban ong ba kam don kano kano ka roi ka par kaba ka Sorkar ka la leh ha kine ki saw snem tam kiba ka Sorkar MDA ka la synshar da kaba ong ruh ba lada kam don kum kata balei pat ka jylla ka ïoh khur bun ki khusnam namar ki jinglah jong ka ban treikam na bynta ka bit ka biang ka jylla.
“Ngi la ïoh ïa ka khusnam na ka United Nations halor ka e-Govarnance. Ngin sa ïoh ruh ïa ka Presidential Award halor ka jinglah ban pyntrei ïa ka skhim Jal Jeevan Mission (JJM) na ka President jong ka ri India, ngi ïoh ka khusnmam halor ka koit ka khiah, ngi ïoh ka khusnam halor ka jingkyrshan ïa kiba seng kam lajong bad kiwei de ki khusnam bad kane hi ka pynpaw ïa ki kam kiba la leh ban ontg ruh ba ngim leh eiei ha kine ki saw snem ka long kaba ym don nongrim tang shisapit ruh” ong u Myntri Rangbah.
Haba kylli halor ka da ki phew hajar ngut kin pan ïatai nia hato kum ka sorkar ngin don por mo ban leh ïa kata” u la ong shuh shuh.
Haba bynrap halor kane, u Symbud Myntri Rangbah ka Jylla u Bah Prestone Tynsong u la kynnoh ba u Saket Gokhale ba u dei u Magician bad um dei satia u Politician namarba tang ar bnai ba u la wan khnang sha nongbah Shillong u la tip lut nadong shadong ïa ka jylla Meghalaya.
Kane ka jingkynthoh jong u Bah Prestone ka long hadien ba u Gokhale u la kob ïa tainia hakhmat ki lad pathai khubor ïa u Symbud Myntri Rangbah bad ïa u Myntri Rangbah ka Jylla u Conrad Kongkal Sangma ha kaba ïadei bad ka jingbym hok shuh ka synshar ka khaddar ha Meghalaya hapoh ka jingsynshar jong ka Meghalaya Democratic Allaince ba ïalam da ka National Poeples Party.
U Bah Prestone u ong ruh ba u Gokhale um dei satia ban tuklar eiei ïa ka synshar ka khaddar ha ka jylla Meghalaya hynrei u dei ban leit tuklar sha ka Jylla West Bengal ba la synshar da ka Trinamool Congress namarba dei tang ki paidbah ka Jylla Meghalaya kiba lah ban tuklar ïa ka synshar ka khadar ha la ka jong ka jylla hynrei ym da ki briew shisngi kiba nabar.