Khliehriat, Nailur 29: Ka Federation of Khasi Jaiñtia and Garo People East Jaiñtia Hills District mynta ka sngi ka la leit buh da ka jingujor ha khmat u Deputy Commissioner ka East Jaiñtia Hills District bad ujor pyrshah ïa ki trok kit mawshun kiba kit palat pud kiba ïaid lyngba na ka surok NH-6 East Jaiñtia Hills District bad ong ba kane ka jingkit palat pud ka wanrah shuh shuh ïa ka jingjot jingjulor ka surok nalor ba ka surok national highway ka dei kaba la jot la pra kane kan nang buh jingeh shuh shuh ïa ki nongleit ngongwan.
Katkum ka shithi ba la soi da u General Secretary FKJGP East Jaiñtia Hills District, u bah Fullmoon Nongtdu bad u Information Secretary, u bah Michal Chyrmang, ka seng ka pynpaw ka jingsngewkhia halor kane ka jingkit palat pud ki trok kiba kit mawshun kiba kit na ki par mawshun bapher bapher kiba ïaid lyngba na ka surok NH-6 East Jaiñtia Hills District namar ba lada ka jingjulor ka surok kan nang jur kan wanrah jingeh ha kiba bun ki liang.
Na ka liang ka seng ka buh ka jingkyntu ïa u Deputy Commissioner ba un sngewbha ban tuklar lem halor kane ka jingkit palat pud ki kali kit mawshun bad ban phah bat noh ïa kito ki trok kiba kit palat pud bad ruh ban pynshitom ïa ki katkum ki aiñ jong ka Motor Vehicle Rule khnang ban lait na ka jingjulor shuh shuh ka surok, namar kumba long mynta ka jinglong jingman ka surok NH-6 ha East Jaiñtia Hills District ka la dap sa tang ki thliew ki syar suda bad buh jingma ïa ki nongleit nongwan.
