Shillong, Nailur, 29: Ka President jong ka Mahila Pradesh Trinamool Congress Committee ka Selma D. Shira ka la ïasam ïa ki jingangnud ban trei na ka bynta ka bha ka miat jong ki kynthei ha kane ka jylla Meghalaya.
“Kum ka President jong ka Meghalaya Pradesh Trinamool Congress Committee, ka kamram kaba hakhmat eh bad ka thong jong nga ka long ban kyntiew ïa ka rukom im jong ki kynthei ha kane ka jylla,” ong ka Shira.
Haba kynthoh halor ka jingbym shngaiñ jong ki kynthei ha kane ka jylla Meghalaya, ka Shira ka la ïathuh ba kan sdang ban pynlong ïa ki jingïathir ïatai bad ki District Mahila Congress Committee bad ki Block-level Mahila Committee.
“Ki block level kin trei ha ki jaka ki jong ki da kaba ïasyllok bad ki riewkynthei na ka bynta ban pynshai shaphang ka kamram jong ki kynthei ha ka saiñpyrthei,” ka la ong.
Ha ka 26 tarik mynta u bnai ka Meghalaya Pradesh Trinamool Congress ka la pynkha ïa ka shnat treikam jong Women Wing-Meghalaya Pradesh Mahila Trinamool Congress Committee da kaba thung 18 ngut ki dkhot.
Ka Meghalaya TMC ka angnud ban ai jaka na ka bynta ban pynrung ïa ki kynthei ban pynphriang ïa ki thong jong ka party ha kylleng ka jylla.
Napdeng ki 18 ngut ki nongkitkam bad ki Executive member, ka Selma D. Shira ka la shah thung kum ka President jong ka Mahila Pradesh Trinamool Congress Committee, ka Mehalin S Marak, Kong Kathleen Marbaniang bad ka June E Marak ki la shah thung kum ki Vice President, ka Merilline Ch Marak bad ka Kong Noorun Mehraj Warjri ki la shah pynkhamti kum ki General Secretary hapoh ka Committee.
Da ka jingpynkha ïa ka Women’s Wing, ka Meghalaya TMC ka la buh hakhmat ïa ka thong ban sei madan ïa ki jingbym trei hok jong ka Sorkar MDA.
