Ka sorkar jylla ka buh hakhmat eh ïa ki nongrep bad ka rep ka riang, ong u Myntri Rangbah ka jylla

Nongpoh, Nailur 28: U Myntri Rangbah ka jylla u Conrad K Sangma u la ong ba ka sorkar jylla ka buh hakhmat eh ïaki nongrep bad ka rep ka riang ka dei ka thong ba hakhmat naka bynta ban kyntiew ïaki nongrep haka jylla katkum ka juk stad ba mynta, haba kren haka prokram ba lai sngi lynter bala tip kum ka Interface with Award Winning KVKs- Building of Success bala pynlong da ka Directorate of Extension Education jong ka Central Agriculture University (CAU), Imphal ha ryngkat ka jingïatreilang bad ka Indian Council of Agricultural Research (ICAR)-Agricultural Technology Application Research Institute (ATARI) jong ka Zone-VI na Guwahati bad ka Zone-VII na Umiam mynta sngi ha ICAR Umiam.
U la ong ruh ba kane ka dei ka sien ba nyngkong eh ba la pynlong ïa kum kitei ki jait prokram ban pynithuh ïaki jingtreikam jong ki KVKs lane ki Krishi Vigyan Kendra hapoh ka ri.
U la ong ba nalor ka jingpyntip halor shibun ki kam kiba kiba ki saiantis lane ki stad wadbniah ki ju shakri, kane ka prokram ka iarap ruh ban iasam iaka jingnang ka jingtip ka jongki bad ki kam kiba ki ju leh hala ki KVK ha baroh kawei ka ri, bad khamtam eh ha ka thaiñ shatei lam mihngi na ka bynta ka jingmyntoi jong ki paidbah nongrep.
Naka liang u Myntri Rangbah ka jylla u la ong ba bun naki nongrep ki mad jingeh ha kaba ïadei bad ka jingbym ioh thikna ïaki symbai haka por kaba biang ka jingbymdon jong ka lad ban pynïaid iew ïa ki mar rep, ka jingbymdon ki jaka buh kiba biang ïa ki mar rep bad ruh ka jingbymdon ka jingai jingtip lyngba ka jingstad saian ïaki nongrep bad kiwei kiwei de ki jingeh, kumta u la ong ba ki nongrep ki donkam ïa ki lad jingkyrshan bad ki lad jingiarap ha kiba bun ki bynta bad naka liang ka sorkar ka dang peit thuh bad peit bñiah ban pynioh ki lad jingïarap ïaki nongrep.
Hadien ka jingïalang ba lyngkot ha ICAR Umiam naka liang u Myntri Rangbah u la leit ruh ban jngoh ïaki drone bala shna kyrpang lyngba ka project DHaBReT naka bynta ban pyndonkam ha kaba synreit dawai ïaki jingthung bad ki mar rep, bad kumjuh ruh ki dawai bala shna kyrpang ba ki nongrep ki lah ban pyndonkam naka bynta ki jingthung jingtep jong ki.
Ha kane ka sngi la wan ruh ban shim bynta da u Dr VP Chahal, ADG (AE) ka ICAR New Delhi, u Dr AK Singh, DDG (AE) ka ICAR New Delhi, u Dr Anupam Mishra, Vice Chancellor ka CAU Imphal, lem bad kiwei kiwei ki riew rangbah bad ki ophisar naki tnad sorkar.