Pynrem ki 4 seng ïa u riew thrangsnam ba pynïap ïaka samla

Nongpoh, Nailur 27: Ka Joint Action Committee jong ki 4 tylli ki kynhun sengbhalang ba kynthup naduh ka KSU, FKJGP, HNYF, bad RBYF mynta ka sngi kila pynrem jur ïa ka jingshah pyniap dusmon jong ka samla Nisha Nongbet naka shnong Iewmawlong ha u bar jylla haka sngi nyngkong ha surok shnong jong ka shnong Pahamsyiem.
Haba kren sha ki lad pathai khubor mynta ka sngi naka liang u Bah Baiashanlang Kharshanlor President bad u Aristone Manbha Ryndongsngi Secretary ka JAC haka jingsynran lang bad kiwei ki dkhot kila pynpaw ka jingsngewsih bad pynrem jur ïa u bar jylla u ba la nud ban shim wat ïaka jingim jong katei ka samla lud haka rukom pyniap kaba shyrkhei kaba pynpar ñiangkhriat ïa kiba bun ki paidbah wat haka por mynsngi mynshai ha surok shnong.
Naka liang kitei ki 4 seng kila buh ruh ka jingmaham ïa kiwei ki bar jylla kiba sah ha kylleng ki jaka ba kim dei ban ktah kti ïaki samla jong ka jaitbynriew bad lada lap nangne shakhmat naka liang jong ki kin sa leh da kaba tyngeh bad kaba donkam bad kyntu ruh ïaki samla khasi ba ki dei ban peit bha ha kaba ïadei bad ka shongkha shongman khamtam bad ki bar jylla.
Halor katei ka bynta kum ka jingpynrem jur ïa katei ka jingshah pyniap jong katei ka samla Khasi, naka liang ka JAC jong ki 4 seng kan sa pynlong da ka jingïaid paidbah (Rally) bad kumjuh ruh ka jingthang monbati haka 30 tarik mynta u bnai ban sdang naduh ka shnong Iewmawlong bad pynkut pat ha Nongpoh Town Shopping Complex.
Naka liang JAC kala kyrpad ruh ïaki paidbah naduh ki nongmihkhmat, Nongïalam shnong, ki longkmie longkpa, ki khun samla, ki skul ban ïa mih ryntih ha katei ka sngi katei ka samla ban pynpaw ïaka jingpynrem jur halor ka jingshah pyniap dusmon katei ka samla ba kum kitei ki jingjia kim dei ban dang jia nangne shakhmat.