La pynlong ka jingkynmaw burom ïa ka lyngkhuh snem ba hynñiew ka jingkhlad noh u Maieit Hoping

Mawkyllei, Nailur 26: Ka Dorbar Kur Lyngdoh Nonglait mynta ka sngi, ka la pynlong ka jingrakhe dap hynñiew snem ka jingkhlad noh u Maieit Hoping Stone Lyngdoh, uwei na ki nongïalam ba khraw jong ka jaidbynriew.
Ïa kane ka jingïalang kynmaw burom la pynlong ha Mawkyllei ha kaba u Bah HB Nongsiej, MLA Mawthadraishan bad u Myntri ka sorkar jylla u la long u Kongsan. U DC jong ka Eastern West Khasi Hills District u la long u Symbud Kongsan. La ïadon lang ruh i Kong Biolinda Lyngdoh Nonglait, Bah Daniel Lyngdoh Nonglait, ki Rangbah Kur Lyngdoh Nonglait bad ki Nongïalam HYC bad KSU na Mawthadraishan,ki Khynnah Skul bad ki paidbah nongshong shnong.
Haba kren ha kane ka jingïalang ba la pynïaid da u Babu Manly Lyngdoh Nonglait, Acting Basan ka Kur Lyngdoh Nonglait, u Bah Brolding, u la ong ba u Maieit Hoping udei u briew ubym ju thait satia ban kren shaphang ka kam ïapynbeit pud bad ka Assam.”Naduh ba nga dang ïakynduh nyngkong ïa u haba nga dang treikam la jong, u Maieit ju kren beit shaphang ka jingpynbeit pud bad ka Assam, ym ju kren ïa kiwei kiwei pat ki kam”, la ong MLA Mawthadraishan.
U la ong ba kane ka pynpaw ïa ka jingangnud jong u ba ka jylla kadei ban don la u jong u pud u sam uba thikna bad u Bah Nongsiej, u la ong ba halor kane ka nongrim, ka sorkar MDA ruh ka la ïapynbeit ïa u pud u sam bad ka Assam ha ka bynta kaba nyngkong. U la ong ruh ba shen yn sdang ïapynbeit biang ïa u pud u sam ha ka bynta kaba ar.
U DC ha ka jingkren jong u, u la ong ba u Bah Hoping udei u nongïalam uba ieit bha ïa ka jingnang jingstad bad dei ha ka por ba u long kum u EM jong ka tnad Education mynba ki Primary School ki dang hap hapoh ka jingpeit ka District Council, u Bah Hoping, u la seng palat shi hajar tylli ki Primary School ha kiba bun ki bynta jong ka Khasi Hills.
U la ong ruh ba une u rangbah, udei uwei na ki nongïalam ba ki paidbah kim lah ban buh jingkylli ne artatien ïa ka jinglong hok bad jinglong shida jong u ha kaba shakri ïa la ka ri bad ka jaidbynriew.
Lyngba ka jingïoh pule jong u ïa ki kot, u DC u la ong ba u Bah Hoping u la bat ïa ka kam MDC, EM, MLA bad Myntri sorkar bad kumjuh ruh kum u MP.
I Kong Biolinda ha ka jingkren jong i, i la pynpaw ka jingsngewkmen ba ka Kur Lyngdoh Nonglait ka la sei shibun ki riewkhraw kiba la long ka jingsarong ïa ka Kur. Ki riewkhraw kum ka Phan Nonglait, u Maieit Hoping kidei ki riewkhraw kiba la ai mynsiem ïa kiba bun bad kadei ïa ki longdien ban bud ïa ki nuksa jong ki ha kine ki sngi ba mynta bad i kyrmen ruh ba kane ka jingrakhe kan ai mynsiem ïa kiba bun kiba bud nadien jong kine ki nongïalam.
La ïoh jingkren ruh na u Bah Daniel Lyngdoh Nonglait, uba la thoh bad pynmih ïa ka kot halor ka jingim bad ka jingtrei u Maieit Hoping ha kine ki snem kiba la leit. U la ïathuh ba kumne ki riew rangbah kum, u Pastor MJ Hynñiewta, u Father Sylvanus Sngi Lyngdoh, ki la kyntu bad ai mynsiem ïa u mymba u dang long u Samla pule ban thoh ïa ka kot shaphang u Maieit Hoping.
Ha kane ka jingïalang kynmaw burom, la pynkup burom ruh ïa ki samla pule kiba dei na ka thaiñ Rikhaiñ kiba la wan shakhmat ha ka eksam SSLC, HSSLC bad Degree.
La ïoh ruh ïa ka jingkren na ki nongïalam ka KSU bad HYC bad la pyllait paidbah ruh ïa ka jingrwai shaphang jong u Bah Hoping la pynmih da ka HYC.
Ha kane sngi la pynlong ruh ïa ka jingbuh syntiew ha u mot dur jong u Bah Hoping, uba la tei hakhmat ka Dorbar Hall jong ka Kur Lyngdoh Nonglait kaba la pynlong ruh ïa ka Mawkyllei College.
La ïoh ruh ïa ki jingrwai na ki Khynnah Skul ha kane ka jingïalang.
Ha shuwa jong ban sdang ïa ka jingïalang la pynlong ruh ka jingsngap jar kaba shi minit kum ka dak ka jingkynmaw burom ïa u Bah Hoping bad kumjuh ruh kiwei kiwei de ki nongïalam jong ka Kur Lyngdoh Nonglait.