Kynduh DC ka Synjuk ban ujor halor ka jingïohlad ki paid Karbi ban pynlong da ka jingïakhih paidbah ha Block II

Nongpoh, Nailur 26: Ki nongïalam ka Synjuk ki Rangbah Shnong Border Area ba hap ha ka Raid Nongtung mynta ka sngi ki la leit syndon ban kynduh ïa u Deputy Commissioner ka Ri Bhoi ban kyrpad lem ban pynsangeh halor ki jingleh pyrshah ki paid Karbi ban pynlong ïa ki jingïakhih na ka bynta ki kam pud ki kam sam ha kaba wat lada la dep ban pynbeit ba en ym shah ban don kino kino ki jingïakhih ha kane ka kam ïa pynbeit pud hapoh katei ka thaiñ Block II ha Ri Bhoi.
Kum ban pynpaw, ka sorkar Meghalaya bad ka sorkar Assam ki la rai ban ïa pynbeit ïa ki kam pud ki kam sam ha ka wat kaba ar ba kynthup ïa ki jaka ba hap ha ka thaiñ Block II bad na baroh ki ar sorkar ki la rai ban ym shah ban don kino kino ki jingïakhih ha katei ka thain, hynrei ki paid Karbi ryngkat ki jaid bynriew Nepali pat ki ioh lad ban pynlong ïa ki jingïakhih khlem da don kano ka jingteh jingkhum la ka long na ka bor district Ri Bhoi bad na ka bor District West Karbi Anglong.
Dei halor kine ki nongrim, ki nongïalam ka Synjuk k Rangbah Shnong Border Area hapoh ka Raid Nongtung mynta ka sngi ki la kynduh ïa u Deputy Commissioner ka Ri Bhoi, u Arpit Upadhyay bad la aiti ruh ryngkat ka dorkhas ban kyrpad shim khia halor kitei ki kam ïaleh pyrshah ki paid Karbi bad ki Nepali ha Block II. Na ka liang u President ka Synjuk, u Bah Blikstar Sohtun u la pynitip ba kum ki paidbah Khasi ruh ki sngewkhia halor kane ka jingleh ki paid Karbi bad ki Nepali, namar na ka liang ka bor District West Karbi Anglong kim shym la tehlakam bad ailad ban pynlong ïa kane ka jingïakhih kaba ktah ruh ïa ka shongsuk shongsain ki paidbah ha kitei ki shnong ba dang sahkut ka jingïapynbeit pud pynbeit sam da ki ar sorkar.
U la ïathuh ruh na ka liang ka Synjuk ka la kyrpad ruh ïa u Deputy Commissioner ka Ri Bhoi ba un ïa kren ïa ki bor synshar District ka West Karbi Anglong ba kim dei ban ailad ban pynlong kino kino ki lad jingïakhih halor ki kam pud ki kam sam katba dang ïaid ka jingïapynbeit pud bad lada ki paid Karbi ki dang ioh lad khlem da don kano kano ka jingtehlakam wat ki paid Khasi ruh kim banse ban pynlong ïa ka jingïakhih namar don shibun ki mat ba hap ban ïa kren halor ki kam pud ki kam sam ba ki burom tang ïa ka jingbthah ne hukum ki ar sorkar khnang ban ïaid beit ki kam ïa pynbeit pud hapdeng ka Meghalaya bad ka Assam ha kane ka wat kaba ar.
Namarkata, u la pynpaw ruh ba ka synjuk ka khmi lynti ba u Deputy Commissioner ka Ri Bhoi un shim khia ïa kane ka kam ban ïa kren sha ki bor district ka West Karbi Anglong ba nym don kino kino ki jingïakhih kumba la khang da ki ar sorkar bad lada kitei ki paid Karbi bad Nepali ki dang bteng kum ki paid Khasi ruh kim banse ban pynlong ïa ki jingïakhih ba kum ki paid Khasi ruh ki don shibun ki mat ba hap ban ïa kren ne pynpaw, u la bynrap.