La aiti ki Pulit ïa ka Roster System sha ka Home Deptt., shen yn pyndep ïa ka thungkam: DG

Shillong, Nailur 24: U Director General of Police (DGP) ka jylla u Dr. LR Bishnoi u la ïathuh ba ka jingpynrung kam jong ka tnat Pulit kan sa urlong noh shen hadien ba na ka liang ka tnat ka la dep ban aiti aia ka Roster sha ka tnat Kam Poh Ïing ka jylla.
U Dr. LR Bishnoi u la ong ba ka jingslem ban pyndap ïa ki kam ba thylli ha ka tnat ka dei namar ka jingwan ka rai bishar ka Meghalaya High Court kaba la hukum ïa baroh ki tnat sorkar ba kim dei ban thungkam ha kino kino ki kam ba thylli katba ym pat lah ban pynkhreh ïa ka Roster System ban thung kam kat kum ki kyndon jong ka Reservation Policy jong ka jylla.
“Ka Police Headquarter ka la dep ban phah ïa ka jingai jingmut haba ïadei bad ka jingpyntreikam ïa ka Roster System na ka bynta ka kam pulit Constable jong ka UB bad AB shaka tnat kam Pohïng bad na ka liang ka tnat kan bishar ïa kane ha shuwa ban pynbna ïa ka Notification da ka tnat Personnel” la ong u Dr. LR Bishnoi.
U la ong ruh ba na ka liang ka tnat Pulit hi ka kwah ban pyndep noh ïa ki eksamin ba dang sah khnang ba ka jingpynrung kam yn lah ban pyndep noh kham kloi. Shuh shuh u la ong ba na ka liang ka tnat ka kwah ba la kumno kumno ba ïa ki samla kiban dang rung ha ka kam yn lah ban sdang noh ïa ka jingai jinghikai ha u bnai Nohprah mynta u snem.