Riangdo, Nailur, 24: Ka FKJGP Mawshynrut circle ha ka sngi thohdieng ha ka jingïalam u working president bah Cary Kharmutee bad u bah Willis Syiem general secretary FKJGP West Khasi Hills District, bah Ariferius Diengngan joint secretary FKJGP Mawshynrut circle bad ki nongïalam jong ka FKJGP Mawshynrut circle, ki la leit ïakynduh ïa u Executive Engineer MEPDCL West Khasi Hills District ban ïakren bad pynsngew ïa ki jingeh ba ki paidbah ka thaiñ ki ïa kynduh.
Ka seng ka pynpaw ruh ba ka jingduh light khah khah ka ktah bha khamtam ha kaba ïadei bad ki khynnah pule. Nangta bun kiba im ha ka kam bylla kum ka furniture bad kiwei kiwei kiba pyndonkam da ka light ki la duh kam lut.
Ka seng ka la dawa ruh ban thung shuh shuh kham bun ki nongtrei kum ki casual lane muster roll lane ki permanent, namar haba duh ki line ka shem jingeh tang ar ne lai ngut ki line men kin trei. Ha kajuh ka por ka seng ka dawa ruh ba ka sorkar kan thung noh da u SDO ba pura ym tang u in-charge, khnang ba ki kam kin ïaid beit ïaid ryntih. Ka seng ka dawa ba ka sorkar kan shimkhia ïa kane ka kam bad lada ka dang ïai sngap mynthi, ka seng kan ïaid da kawei pat ka lynti.
