Shillong, Lber 31: Ka Sorkar Jylla hynne ka sngi palei kala mynjur ïa ka PA Sangma Fellowship for Legal & Policy eserach & Training ban iarap ïa ki samla pule ka Jylla ban pule ha ka National Law School of India University.
Haba kren sha ki lad pathai khubor hadien ka jingïalang jong ka kynhun Myntri, u Myntri Rangbah ula ong ba ïa kane ka fellowship programme yn pyntreikam ha ryngkat ka jingiatreilang bad ka National Law School of India University (NLSIU).
“Ka jingthmu jong kane ka prokram ka long ban ïoh ïa ki samla pule bad ki Graduate lane ki briew kiba leit pule Graduation bad Post Graduate ha ka National Law School of India, Bangalore, ba kin ïoh iatreikam bad ka Sorkar India” ula ong haba pyntip ba ka Sorkar kan ai ruh ïa ka stipend na ka bynta jong ki.
Nalor kane, ula ong ba lyngba kane ka jingiatreilang, ki Law Officer ka Tnad Law ka Jylla bad kiwei kiwei ki Tnad Sorkar kin sa pynlong ïa ka Capacity Building Programme.
Ka Kynhun Myntri kala mynjur ruh ïa ka ex-post facto jong ka Amendment ka GST Rules ba pyntreikam ha u snem 2018-2021.
Kala mynjur ruh ban pynjlan ïa ka jingshakri jong u Col Gautum Rai, Director ka Sainik Board bad Col MS Singh, Zilla Sainik Welfare Officer, Tura na ka bynta lai snem.
