Shillong, Nailur 21: Ki Pulit jong ka East Khasi Hills ki la ïathuh ba ki la ujor sha ïingbishar ïa ki arngut ki shi kurim na Laban halor ka jingpynsaphriang khubor lamler ïa i Kong Banrikynti Ryntathiang BLO jong ka Laban.
Ka kyrwoh na ki Pulit ka ong ba la pyntip sha ka ïingbishar halor kane ka jingleh jong kine ki arngut shi kurim khlem da wad bha ïa ka jingpynshisha. Ha kajuh ka por na ka liang jong ki Pulit ki maham tyngeh ruh ïa kino kino ki briew kiba pynthut ne pynwit ïa ki nongtrei jong ka tnad Election Commis sion kiba don ha ka duty.
Ha kajuh ka por, na ka liang ki Pulit ki kyntu ruh ïa ki Dorbar Shnong ba kidei ban da pynbna paidbah lyngba ki tyndong jingsawa haba don kino kino ki jingbthah na ka tnad elekshon ha shuwa ba ki briew ka tnad elekshon kin rung sha ki ïing ki sem, khnang ba kan nym don kano kano ka jingeh hadien habud.
Lah ban kdew hangne ba mynshisngi hadien ba i Kong Banrikynti i la rung sha ki ïing ki sem jong ki briew ban shim ïa ki Pan Card na ka bynta ka jingpynshisha ïa ki EPIC, arngut ki shi kurim ki la shon dur ïa i kan pynmih ha ki Social Media da kaba maham ïa ki paidbah ba kin husiar namar kadei ka riew thok riew shukor.
Hynnin ka sngi pat wat hadien ka jingpyntip jong i sha ki bor Shnong jong ka Laban, hynrei ki bor shnong ruh kim shym la leh eiei halor kane.
