Ha ka sien ba nyngkong ïa kynduh lang ki nongïalam barim bad ba thymmai ka RBYF ha Ri Bhoi

Nongpoh, Lber 31: Naduh ba la suit la shor naduh u snem 1979 ïa ka seng Ri Bhoi Youth Federation (RBYF) ba kan ai ka jingshakri ba kyrpang na ka bynta ki paidbah ka Ri Bhoi bad ruh ban kyntiew ïa ka Ri Bhoi ha baroh ki liang, ka seng Ri Bhoi Youth Federation mynta ka sngi ka la pynlong ïa ka jingïakynduh kaba nyngiong eh hapdeng ki nongïalam barim bad ki nongïalam ba mynta na ka bynta ban dang ïa phylliew jingmut bad ban pynkhlain ïa ka seng ba kan dang lah ban shakri ïa ki paidbah ka Ri Bhoi District.
Ïa kane ka jingïakynuh lang la pynlong ha Auditorium Hall ka Umsning Town Dorbar, Umsning, ha kaba ki nongïalam barim ka RBYF bad ki nongïalam ba thymmai ki la ïa kynduh lang ban ïa kren ne tai shaphang ka seng RBYF kum kawei na ka seng kaba la ioh ka jingshaniah na ki paidbah ka Ri Bhoi.
Ki nongïalam barim ka RBYF naduh u Founder Secretary, u Bah R.B Shadap, ki President barim naduh u Bah Doris Sulein, u Bah F.M Mawphniang, u Bah B.B Makdoh, u Bah C.L Masharing bad kynthup kiwei ki nongïalam naduh u Bah Moris Lyngdoh, u P.N Namsaw, u Bah James Lamo, u Bah Dip Ryntathiang, u Bah Lover Lyngdoh bad kiwei kwei ki nongïalam barim. Ïa ka jingïalang la pynïaid da u Bah Rocky Kylla, Vice President barim ka RBYF.
La ai mynsiem ruh ha kane ka sngi da ka jingdon lang u President ba mynta, u Bah Bipul Thangkhiew, u general Secretary, u Bah Bulet Marbaniang, u Vice President, u Bah L.K Sawkmie bad kiwei kiwei ki nongïalam bad ki dhkot ka RBFY ki barim bad kiba thymmai.
Lyngba kane ka jingïakynduh lang naduh ki nongïalam barim bad ki nongïalam ba thymmai ka RBYF haba kren ha kane ka sngi ki la pynpaw ka jingkmen ba la ioh ban ïa kynduh lang kum ki nongïalam ba thymmai bad ki nongïalam ba la rim ka RBYFbad ki nongïalam barim ka RBYF ki la ïathuh ruh ba hapdeng shibun ki jingeh ba la ïaid lynti bad ka RBYF ka dang tynshai bad dang long kawei na ka seng kaba ioh ka jingshaniah na ki paidbah.
Kumba la kren naduh u President ba mynta, u Bah Bipul Thangkhiew bad kitei ki nongïalam barim ka thong hi jong ka jingïakynduh lang ka long ban dang pynkhlain ïa ka RBYF bad ruh ba ka RBYF kan dang bteng ban shakri na ka bynta ban dang kyntiew ïa ka bha ka miat bad ka roi ka par jong ki paidbah ha Ri Bhoi bad ka RBYF ka la don bynta ruh ha kiba bun ki liang ban wan rah ka jingkylla ha Ri Bhoi naduh ba la seng ïa kane ka seng ha u snem 1979, ong kitei ki nongïalam ka RBYF.