Shillong, Nailur, 21: Ha ka step sngi Balang, ki Pulit jong ka Nongmensong Out Post kiba la ïoh ïa ka jingtip kaba bniah ki la ïohbat ïa kawei ka Local Taxi ba la suba ba ka kit ïa ki tiar ba la shu rong tuh.
Kane ka local taxi kaba don ïa u nombar ML 05E 6607 bad kit ruh 4 t tylli ki bateri kali ba la tuh na ki saw tylli ki kali ba la pynieng ha Last Stop Laban ha ka miet sngi Baar.
Ha kaba ïadei bad kane, ïa ka case la rejistar ha Laban Police Station.
Ki Pulit ka nongbah Shillong kiba ïa peitngor ban ïakhun thma pyrshah ïa u drok, ha ka sngi Balang ha ka por kumba 8:20baje, ki Pulit ka Pasteur Beat House kiba dang ïaid pahara ki la ïoh bat ïa uwei u briew dang die ïa u drok bad uba ïaid sharum shaneng ha ka rukom ba pynisuba ha iew Polo, Shillong.
Katkum u kyrwoh ba la phah da u Superintendent of Police (City) u Bah Vivek Syiem, ka kynhun ki Pulit Anti-Narcotic Task Force ka East Khasi Hills District kiba la ïoh jingtip halor kane ka jingjia ki la kem ïa une u briew bad na ka met jong u, la ïoh kurup 18 tylli ki tyndong ba don ïa u drok Heroin .
