Nongpoh, Nailur 20: Ka skulbah University of Science and Technology Meghalaya (USTM), hapdeng ka jingiphuh iphieng mynta ka sngi kala lah ban pynkup burom ïa kumba 1305 ngut ki samla pule kiba la pyndep ïaki jingpule bapher bapher na katei ka skul bah ba kynthup ïa 15 ngut ki scholars kiba la pyndep ïaka PhD, 775 ngut kiba la pyndep ïaka Post Graduate degrees bad 515 ngut kiba la pyndep ïaka Undergraduate Degrees.
Ha katei ka sngi la pynkup burom kyrpang ruh ïa u Dr NN Dutta da ka Honorary Doctor of Science (D.Sc) u ba dei ruh u Founder bad Chancellor jong ka Assam Downtown University, bad kumjuh ïa u Manas Choudhary Editor barim ka Shillong Times bad u Myntri barim ka tnad pule puthi ka jylla Meghalaya da ka Honorary Doctor of Literature (D.Litt) bala pynkup burom da u Lat ka jylla Meghala u Satya Pal Malik kum u kongsan.
La sakhi ruh ha katei ka sngi da ka jingdonlang u Ma Lakmen Rymbui Myntri ka tnad Pule puthi ka jylla kum u symbud kongsan haka jingdon lang u Mahbubul Hoque, Chancellor ka skulbah USTM, Prof GD Sharma VC USTM, u Dr. B. J. Rao, Vice Chancellor, University of Hyderabad; Dr. N. Lokendra Singh, VC Manipur University; Dr. R. M. Pant, VC, Assam University, Silchar; Prof. Saket Kushwaha, VC, Rajiv Gandhi University, Aunachal Pradesh bad u Dr. V. K. Jain, VC barim ka Tezpur University bad kiwei kiwei ki khraw pyrkhat.
Haba kren ha katei ka sngi naka liang u Lat ka jylla u Satya Pal Malik u la ai ka jingkhublei ba kyrpang ïa baroh ki samla pule kiba la pyndep ïaki jingpule bapher bapher na katei ka skulbah bad khamtam ïaki 2 ngut kiba la shah pynkup burom kyrpang ba kynthup ïa Dr NN Dutta bad u Manash Choudhary halor ka kam kaba ki shakri bad noh synñiang sha ka imlang ka sahlang ha kaba ïadei bad ka thoh ka tar bad ka pule ka puthi.
U la ai ruh ka jingïaroh ïa katei ka skulbah ba dei ka jingiohi jngai jong u Mahbubul Hoque ba katei ka skulbah kala long shisha ka jingkyrkhu ïaki samla pule haka jylla bad kumjuh ka thaiñ Shatei Lam Mihngi, kumba kala dei kawei naki shlem ai jinghikai kaba la paw haka jylla bad shabar bad khmih lynti ba katei ka skulbah kan sei ïaki khlur bad ki khraw pyrkhat ba thymmai ki ban tei ïaka lawei jong ka jylla bad ka ri baroh kawei.
