Ynnai pyrta ‘Ha ri la jong katba mon’, lada ngim nang ban sumar ïa ka mariang: W.R Kharkrang

Nongstoiñ, Nailur, 20: Na ka bynta ban wanrah ïa ka jingkhuid jingsuba hapoh ka sor Nongstoiñ bad ban lait na ka ka jingpynjaboh ïa ka mariang bad ki sawdong sawkun, ka District Swaach Bharat Mission West Khasi Hills, ha ryngkat ka jingïatreilang bad ka ophis u Deputy Commissioner bad ka Seng Samla New Nongstoiñ, ha ka sngi ba ar ka la pynlong ïa ka jingpynshai paitbah halor ka jingkhuid jingsuba bad kumno ban kiar na ka jingbret pathar ia ki mar bym long shuh, kum ki bilor ki plastic bad ki jaboh jabaiñ, kiba pynjaboh ïa ki sawdong sawkun bad kiba bun jingma ruh ïa ka jingkoit jingkhiah.
La pynlong ïa katei ka jingpynshai paitbah ha Market Complex ha khmat ïew Nongstoiñ, ha kaba la pynïaid da u bah G.T Marbañiang Secretary ka shnong New Nongstoiñ ha ryngkat ka jingïadon lang jong u bah W.R.Kharkrang Senior Environmental Engineer jong ka State Polution Control Board Shillong kum u resources person, u bah M.Diengdoh MCS Additional Deputy Commissioner, bah B.Toi Executive Engineer PHE West Khasi Hills, u bah J.R Nongsiej District Coordinator DSBMG West Khasi Hills bad kiwei kiwei ki nongtrei sorkar bad ki riew rangbah ka thaiñ.
Haba ai jingkren ha katei ka sngi u bah M.Diengdoh u la ong ba man la ka por, ki bor pynïaid district ki la ju pynlong ïa ki prokram ha ki skul bad ki shnong bapher bapher, ban pynsngewthuh ïa ki paitbah halor ka jingkordor jong ka jingleh khuid bad kumno ban lum ban lang ïa ki jaboh jabaiñ ha ki jaka ba la pynkhreh pynïakhlad ruh ïa ki ba pyut la ka jong bad ki bym pyut kum ki plastic, ki bilor bad ki tin bad ki kynja alluminium la ka jong ka jong.
U la ong ruh ba ka sor Nongstoiñ ka don ar tylli ki wah kiba tuid na mar pdeng kata ka wah Nonbah bad Nondeiñ bad la kumba katto katne snem ka Town Committee, ryngkat ka Dorbar shnong New Nongstoiñ ki la pyrshang katba lah ban ym shah ba ki paitbah kin bret ïa ki jaoh jabaiñ ha kitei ki wah bad ha kine ki sngi ki paitbah ki la sdang ban sngewthuh, hynrei katei ka um kat pat long kaba khuid bad kaba bit ban dih.
U bah W.R Kharkrang u la pynshai halor ka phang kumno ban ïada ïa ka mariang bad ki sawdong sawkun da kaba kiar na ka jingbret pathar ïa ki plastic bad kiwei kiwei ki mar kiba la sniew kiba lah ban set kut ïa ki nur um ha ki surok bad ki nala. Nalor kata u la pynshai ruh ba ha kine ki ar snem ba la dep ha ka por ba u Covid 19 u la wan poi ha ka jylla, ka mariang ka la sdang ban khuid hynrei ha kine ki sngi ka mariang bad ki sawdong saw kun ki la sdang ban jaboh biang.
Nalor kata u bah Kharkrang u la ong ruh ba ha kine ki sngi ki briew ha kylleng ki shnong bad ki jaka ki burom bad ki lehkhuid haduh katta katta ïa ki jaka mane blei, ki jaka kñia, kiba la thaw da u briew hynrei kim nang pat ban ban lehkhuid ïa ki sawdong sawkun bad ka mei mariang kaba la thaw da u Blei. U la ong ba ka jingpynjaboh ïa ka mariang ka dei ka lynti sha ka jingjah rngai jong ka jaitbynriew.
U la ong ruh ba kam don jingmut ban pyrta ‘ha ri la jong katba mon’ lane ka ri Khasi ka dei ka ri kaba kyrpang lada ngim ñiew kor ïa ka mariang bad ngim sngewsarong ïa la ka jong. U bah Kharkrang u la kyntu ruh ïa ki paitbah ba kim dei shuh ban thied ïa ki plastic kiba loa khang da ka sorkar.
U la ong ruh ba ha ka jaka ban pyndonkam da ki plastic, ki paitbah ki lah ban pyndonkam noh da ki sla met bad ki pla jaiñ. U la ong ba naduh mynta ka sngi ka sorkar kam shah shuh ban pyndonkam plastic bad nangne sha khmat, ki bor district kin sa sdang noh ban khynra ïa baroh ki dukan die jingdie bad lada lap ba ki dang pyndonkam plastic kin shah pynshitom.