Nongstoiñ, Nailur, 20: Ha ka sngi saitjaiñ jong ka taiew ba la lah, ka Northeast Institute of Professional Studies Nongstoiñ, ka la pynlong ïa ka ka prokram ha NeIPS Nongstoiñ ban sam ïa ki completion certificate, ki SHR registration certificate bad pyni ruh ïa ki riam kiba la suh hi da ki khynnah kiba ladep shah hikai bad pyntbit na kane ka institution.
Ha kane ka jingïalang, la don ryngkat u Shivansh Awasthi, IAS, Joint Secretary ka Sorkar Meghalaya, Executive Director ka MSSDS, u la long kum u kongsan bad ka Memorial Khongkai, SDO, MSSDS kum ka Symbud Kongsan bad u Michael Thongni, Chief Executive Director, NeIPS.
Kane ka project ka dei kawei na ka mission jong ka sorkar kaba la tip kyrteng kum ka Skills Meghalaya, ïa kaba la bei pisa da ka MSSDS ban pyntbit ïa ki khun samla kiba don hapdeng ka jingpyrshang ban thaw ïa ki lad kamai kajih lyngba ka sap. Ha kane ka sngi la ïoh ïa ka jingpyni nam ki samla ïa ki riam kiba ki la suh, ki jingrwai, jingshad ryngkat ki jingput jingtem.
U Kongsan ha kane ka jingïalang u la ai ka jingïaroh ïa u Michael Thongni u ba long ruh u khlieh duh jong kane ka skhlem ai jinghikai kaba la don ha kylleng ka jylla, ba u long u briew u ba ïohi jngai na ka bynta ki khun samla, ha kaba na ka lïang jong u bad kiwei ki heh sorkar kim shym la kyntait ban ïatreilang, haba u wan ban ïakynduh ryngkat ki proposal bad ïathuh ruh de ïa ka jing angnud bad jingdonkam jong ki samla ha kane ka thaiñ West Khasi Hills.
“Dang shen ka sorkar ha u bnai Rymphang ka la pyrkhat ban pyntrei ïa kane ka scheme kaba dang long thymmai ha ka jylla. Hooid, ki don kiwei ki sheme ruh jong ka sorkar kum ka PMKVY, DDUGKY, hynrei kane ka mission ka kham long kyrpang namar na ka liang u Chief Minister ka jylla u la bthah shai ba ngim dei ban shu kut tang ha ka jingai training bad ym don jingmyntoi ei ei. Hynrei dei ban ïarap ïa ki samla ba kin lah ban leh ei ei hadien ka jingshah pyntbit bad ka thong kaba ha khmat eh jong kane ka scheme, ka long ban ïarap ïa ki samla ba kin lah ban seng kam hi, ha ryngkat ka jingïalam lynti jong ki jaka ai jinghikai. Kaba sngew tynnad eh ka long ba ki samla kim donkam ban mih shabar ka district, hynrei ki lah ban ïoh ïa ki jinghikai ha ki jaka kaba ki sah”, ong u kongsan.
U la pynsngew ruh ba un don ryngkat bad kane ka institution ban shakri ïa ki khun samla ha ka rukom kaba biang tam. U la ai ruh ka jingïaroh ïa ki samla kiba la dep shah hikai namar ki long ki briew kiba ïaishah bad don ïa ka thong ban leh eiei na ka bynta ban wanrah ïa ka jingkylla ha ka ïoh ka kot. U ong ba u kmen shi katdei eh ban ïohi ba kine ki samla ki la long kiba tbit bad bniah ha ka rukom pynwan dur ïa ki jaiñ phong. Kumta, kane kadei ka jingkyrmen ïa ka ri namar ki samla ki don ïa ka thong ban leh ei ei na lade bad ban ieng skhem ha la ki jong ki kjat khlem da ap khmih lynti ïa ka kam sorkar.
U la ong ba kum u heh ophisar un trei naduh ka mynsiem ban kyntiew lem ïa ki samla kane ka thaiñ, da ka ong ruh ba un sa ai ïa ka skills hub ïa kaba ka sorkar ka don jingthmu ban buh ïa ka jingïakynduh lang man ka sngi, lane 3 sien shitaiew ban ïarap ïa ki ban pynsngew ïa ka jingeh jong ki sha ka Sorkar lyngba kane ka Shlem ai jinghikai ka NeIPS. U la ong ka jingthmu kaba ha khmat eh ka sorkar ka long ban ai mynsiem ïa ki samla ba kin ïatreilang da ka kynhun ha ka dur jong ka SHG namar kane kan ïarap shibun eh ha kaban ïa kyntiew mar kylliang kum ki samla kiba don ïa ka jingkitkhlih.
U Michael Thongni ha ka jingkren jong u, u la ïaroh ïa une u heh ophisar ba u long u briew u ba jemnud bad long u ba la kloi ban ïarap na bynta ka jingbha ki samla ka Meghalaya. U la ai khublei kyllum ïa ka sorkar khamtam ïa u myntri rangbah ba don burom u Conrad Sangma ba u la wanrah ïa kane ka scheme kaba ai jingmyntoi shikatdei eh ïa ki khun samla, naba ki samla ki long ki rishot ka lashai bad haba tei ïa ki samla.
Ha ka jingkyntu jong u ïa ki samla u la ong ba kam don kano kano ka kam kaba eh ne jwat lada ka mon bad ka thong ka skhem. Kumta ban pynlong pynman ïa kano kano ka jingdonkam, dei ban theh ïa ka por bad aiti ruh ïa lade khlem kano kano ka jingpynsngap ïa ka jingsngew jaituh ka met.
‘U lane ka briew kiba jop dei kiba minot ïa ka thong, ki bym don ïa ka thong ki long ki briew bym im bad ki long ruh ka jingtim ïa ki mandien. Kumta kum ki samla la buh ha ka tyrpeng jong ngi ïa ka lashai bad ngim dei ban ailad ba kata ka lyngkor ban shah tyngrong ha u diengpyut, hynrei ha u dieng ba skhem kum u samla ba skhem ka thong’, u la ong.
