Nongpoh, Nailur 18: Ka Rynjah Herbal Care Society kaba dei kawei naki kynhun jong ki nongsumar dawai kynbat bad tynrai haka sngi Saitjaiñ kala pynlong da ka jingïalang ha Umsning naka bynta ban pynshai sha ki paidbah halor ka rukom sumar kynbat ban pynkoit ïaki jingpang bapher bapher wat ki jingpang bala shem jingeh da ki Hospital ban sumar.
U Dr. Philling Rynjah u ba dei u Founder bad Director ka Herbal Practitioner u ba don ruh ka Herbal Care Center ha Umsning kawei naki jaka ai dawai bad jaka sumar da ki dawai kynbat ba pawnam ha Umsning haba kren ha katei ka sngi u la ong ba ka rukom sumar dawai kynbat ka long kaba kham pher bad kaba shngaiñ ba ki paidbah ki lah ban shaniah kumba naka liang jong u, kum uwei naki nongsumar dawai kynbat u la lah ban pynkoit shibun bah ki jait jingpang bapher bapher kum ka jingpang bampong, jingpang stem, jingpang ïapshiliang, jingpang snieh doh bad kiwei kiwei.
U la ong ruh ba kum ka Society ka ju pynlong ïaki prokram bapher bapher ban ai jinghikai bad pynsngewthuh sha ki paidbah halor ka rukom sumar dawai kynbat ba lah ban pynkoit shibun bah ki jait jingpang bapher bapher.
Nalor ka kam sumar bad ai dawai naka liang ka society ka ju pynshlur ruh ïaki paidbah ban pynneh pynsah bad ban thung ïaki dawai kynbat khnang ba ki jait dawai ba ju pyndonkam kin nym duhjait na kane ka jaka ban long pat ka jingkyrkhu ban pynkoit ïaki jingpang khamtam kaba long ruh kum ka lad ai kam ai jam sha ki samla kiba thung thikna bad sumar ïaki dawai ba ki lah pat ban die sha ki iew ki hat.
