Shillong, Nailur 16: Ki nongïalam ka KSU kynthup ïa u Bah Lambok Marngar, President, Bah Donald Thabah General Secretary bad u Bah Biangbor Paliar, Vice President ki la leit ïakynduh ïa ki nongïalam ka HNLC kiba la wan sha jylla na ka bynta ka jingïakren ïasuk bad ka sorkar.
Haba ïakren bad u Bah Lambok, u la ong ba kane ka jingleit ïakynduh jong ka Seng ïa ki ka long ban ai mynsiem bad kyrshan ïa kane ka jingwan ïakren ïasuk bad khamtam eh ïa ki ishu ba ki la ïeng mynta la bun bun snem.
“Kadei ka jingleit ai mynsiem bad ban kyrshan ïa ka jingïaleh jong ki”, la ong u President ka KSU.
Ha kane ka jingleit la don lang ruh u Bah Sadon K. Blah, uba long u Ksiang jong ka HNLC bad u President ka HNYF.
Lah ban kdew hangne bva ka HNLC ka la jied san ngut ki nongïalam ban ïashim bynta ha kane ka jingïakren ïasuk bad ka sorkar kaba haduh mynta ym pat tip lano kan long.
