Nongstoiñ, Nailur 13: Ki paidbah kiba ïoh jingmyntoi lyngba ka surok shnong jong ka Thiepjaphlang kaba pynïasoh ïa ka Shilliang Rynñiaw bad kiwei kiwei ki shnong, ki la pynpaw ka jinglyngngoh bad ym lah shah ban ïohi ïa ka jingbym shimkhia ne shim jingkitkhlieh jong ki riew rangbah jong kitei ki shnong, khamtam ïa ki bor pynïaid shnong, namar ka jinglong jingman jong ka surok ka la pynsyrtok shisha ïa ki paidbah.
La ban kdew hangne ba la pyntrei ïa katei ka surok da ka Scheme MGNRGES kaba hap hapoh jong ka Mawshynrut C&RD Block la kham slem. Ha ka jingshisha ka jingïoh jong kitei ki shnong ban pyntrei ïa ka surok ka la long shisha ka jingkyrkhu ïa ki paidbah jong kitei ki shnong namar ym pat don surok PWD khamtam ha ka kit ka bah ka pang bad ka shitom.
Hynrei, na ka jinglong thurmur, shim kabu bad khlem pyrkhat jong ki briew ba khwan myntoi shimet, ki shah ïa ki kali heh kit dieng supply kit rnga haduh ban da ktieh, thliew ka surok bad ym don jaka shuh ïa ki kali rit ba kin dang ïaid. Bun tylli ki shnong kiba pynïasoh lyngba katei ka surok kum ka Tlon, Nongshynrut, Nongkrong, Photjylle bad ka mih ruh sha duh Shyrkon, Maweit ter ter, ki la pynpaw ka jingbitar namar ka leit ka wan jong ki khamtam kiba pang ba shitom ki la shah ktah.
Ha jingshisha katei ka surok kam dei ka surok na bynta ki kali kit dieng ne kali kit rnga, namar kam dei ka surok PWD. Hynrei tang namar ka jingmyntoi ïalade shimet kim salia. Ki kali rit kum ki sumo, pickup kiba ju wan iew wan hat bad kiba ju wan kit ïa kiba pang ba shitom, kim long ïaid shuh bad teng teng poi wat haduh ban sahkut hapdeng surok.
