Ujor ka HITO Byrnihat sha u DC halor ka jingtih khyndew khlem akor ka kompani bar jylla ha Narbong

Nongpoh, Nailur 12: Ki nongïalam ka Hynñiewtrep Integrated Territorial Organization (HITO) Byrnihat area mynta ka sngi ka la ujor syndon sha ki bor pynïaid district ka Ri Bhoi District pyrshah ïa ki nongpynïaid ka kompani bar jylla ba la khlieh da u Utam Jhunjhunwala namar ka jingtih khyndew palat liam haduh ba ka ktieh ka la pynthud ïa ka leit ka wan u paidbah ha ka thaiñ Narbong, Umjojwa ha Byrnihat.
Katkum ka jingïathuh da u samla Kapil Kurbah, President ka HITO Byrnihat, u la pynpaw ba ka seng ka dap da ka jingsngewkhia kaba jur halor ka jingtih khlem akor ka kompani u Utam Jhunjhunwala ïa u lum harud u surok shnong ka Narbong Umjojwa bad khlem da bud thik ïa ki jingbthah ban ïada ïa ka ktieh ban tuid sha surok khamtam ha ka por slap.
U la ïathuh ruh, ba kane ka jingtih khyndew kaba la long khlem akor haduh katta katta namar ka la wanrah ïa ka jingeh kaba khraw ki paidbah nongleit nongwan khamtam ki khynnah skul kiba hap ban ïaid na katei ka jaka, na ka liang ka seng ka la leit ruh ban jurip ïa katei ka jaka bad ban kynduh ïa u Zunzunwala hynrei um shem la kren shai eiei halor ka jingtih khyndew ha Narbong Umjojwa.
Kumta na ka liang ka seng ka la shim syndon da ka lad kaba tyngeh da kaba ujor sha ki bor pynïaid district ka Ri Bhoi District bad la kyrpad na u Deputy Commissioner ka district ban shimkhia ban tohkit bad ruh ban weng ïa ka jingeh ka leit ka wan u paidbah baroh ha katei la thaiñ Byrnihat.