Nongpoh, Lber 30: Ka Hynniewtrep People Federation (HPF) haka jingïalang kyrkieh bala shong mynta ka sngi kala phah ïaka kyrwoh ban ai ka jingkyrshan ba pura bad kitbok ïa u Bah Sadon K Blah ba dei u President ba rangbah jong ka HNYF, sengkmie u ba la shah thung kum u ksiang ka HNLC ban ïakren ïasuk bad ka sorkar.
Haka kyrwoh bala phah da u Bah Apbor Nongrum President ka HPF Ri-Bhoi District lem bad u Bah Silverus Masharing Vice President kila pynpaw ka jingsngewkmen hadien baka sorkar kala tyrwa ban ïakren ïasuk noh bad ka HNLC kaba dei ka seng lehnoh bala kheiñ beaiñ haka jylla.
Kila pynpaw ruh ba kane ka dei ka sienjam kaba biang eh ba ka sorkar lem bad ka HNLC kin don noh ka jingsngewthuh jingmut ban poi sha ka thong naka bynta ban wanrah noh ka suk ka saiñ haka jylla bad khmih lynti ba katei ka jingïakren kan long kaba seisoh kumba ka HNLC bad ka sorkar kila don la u jong u ksiang naka bynta ka jingïakren.
Naka liang ka seng kala kyrpad ruh sha ka sorkar ban pynkloi ïaka jingïakren ïasuk ban wanrah pat ïaka suk ka saiñ haka jylla ba ki khun samla kin im bad ïaid haka lynti kaba dei ban lait naka jingïaum snam bad ka huri hura.
