Ka Thaiñ Labang – Nongphyllut Elaka bad Pangam – Raliang ( Block – I ) ki dei ban wan sha Ri Jaiñtia

Bah Kiron Lyngdoh.
Jowai Lyber 30. Katba ka jingïakren ïa pynbeit pud hapdeng ka Meghalaya bad Assam na ka bynta ki hynriew na ki khatar jaka kiba ïa khajia pud hapdeng ka Meghalaya bad Assam ha New Delhi ha kane ka 29 tarik Lyber 2022, ki Nongkitkam ka Elaka u Dolloi Nongphyllut bad ki dkhot jong ka Labang-Nongphyllut-Pangam-raliang Council (LNPC), ka Seng kaba ïaleh bad ïai ïaleh ban pynwan ïa ka Thain Labang-Nongphyllut bad Pangam-Raliang ki don ka jingïalang ha Jowai ban ïa pyrkhat kam ïa ka lawei ka im ka ïap ka thaiñ jong ki.
Ka jingïalang ka la jied ruh ïa ki Nongmihkhmat jong ka ba kin sa lait ïa kynduh ia u Chairman ka Regional District Boundary Committee bad ïa u Chief Minister ka sorkar Meghalaya hadien ka 9 tarik APRIL 2022.
Kane ka jingïalang ka la shim ka rai ba ka thaiñ Labang-Nongphyllut, Elaka u Dolloi Nongphyllut bad ka thaiñ Pangam-Raliang, Elaka u Dolloi Raliang, ki dei ki bynta jong ka Ri Jaiñtia bad ki Nongshong shnong ki dei ki Pnar (Jaiñtia) kiba la shah khliah jubor (forcibly tagged) da ka Sorkar Assam, hapdeng ka jingbymhun ki paidbah nongshong shnong jong ka thaiñ, ka Jaiñtia Durbar, ka Note of Dissent da u ma L. Khyriem MLA. Shuh shuh ka Notification No. TAD/R/31/50/ 149, 13th April 1951, kam don shuh naba la pynïap pynduh pyndam ïa kane ka Notification 13 tarik April 1951 da ka Memo. No. TAD/REV/90/55(b) Shillong 21st. November 1955 bad da ka shithi ka Sorkar Assam Tribal Area Department No. TAD/GA/83/50 dated Shillong 5th November 1957 bad kane ka thaiñ Labang-Nongphyllut Dolloiship bad Pangam-Raliang ka dei ban wan biang hapoh u pud u sam jong ka Ri Jaiñtia rai ka jingïalang. ïa ka jingïalang la pynïaid da u Waheh B. Shadap.
Halor kane u ma M.M. Thaiang ula ong ba u don lang ha kane ka jingïalang. Haba la pyrshang ban kylli na u ma Thaiang, kiei de ki mat kiba kane ka jingïalang ka la ïarai, ka jubab ka long ba kumba long mynta “ym dei ban pyni ïa u Khnam ha ka Tyngap”. Ki Paidbah Nongshong shnong ka thaiñ ki la ïaishah ha kine ki 70 snem kiba la leitnoh, kin nangïaishah haduh ba kaei ka rai jong ka jingïapynbeit pud hapdeng ka sorkar Meghalaya bad ka sorkar Assam ha kine ki sngi bad ka por ka ban dang wan.