Shillong, Nailur 9 : U Myntri Rangbah ka jylla u Conrad K Sangma ula ong mynta ka sngi ba ka sorkar jylla kan sa pan jingpynshai shwa na ki pulit ophisar jongka Tactical Team -I kiba donkti ha ka jingleit khynra bad jia ka jingshah siat iap u General Secretary ba rim ka seng HNLC u bah Cherishterfield Thangkhiew ha ka 13 tarik Nailar 2021.
ïa kane ka rai la shim hadien ba la wanrah ïa ka kaiphod jingtohkit na ka “One Man Commission of Enquiry” u Justice T Vaiphei hapoh ka ïing dorbar thawaiñ ka jylla mynta ka sngi.
Ha kane ka kaiphod la kdew shai ba ka jingpynkhreh ka biang bha nadong shadong hynrei ka jingpyntreikam pat ka tlot bad bakla palat namar ka jingthmu ka long ban kem im ïa u bah Thangkhiew.
“ Hooid ka Commission ka la bishar sani bha ïa kane ka kam bad ka la lap ba la dei ban leh ha kawei pat ka dur ne rukom. Kumta shen yn sa khot ban pan jubab jingpynshai na baroh kiba donkti ha katei ka Tactical Team-I. Hadien ba ngi la ïoh sngew na baroh ki liang ngin sa leh ïa kaba donkam kat kum ka aiñ” ong u Myntri Rangbah.
U la kular ruh ba ka sorkar kan leh ïa kaba donkam kat kum ka jinglap jong ka jingtohkit.
Haba la kylli balei ba ym shym la ai da ka kaiphod kaba pura kum kaba la ai sha ka sorkar bad balei ïa ki kyrteng jongkiba donkti la pyndam noh, U Myntri Rangbah ula ong ïa ki kyrteng jong ki pulit ophisar kiba ïadon kti la weng noh namar ka dei ka jingai jingmut jongka Commission namar lada pynmih kan buh ïa ka jingim jongki ha ka jingma.
“ Ka Commission ka la ai jingmut ha ka kaiphod ba ïa ki kyrteng ym dei ban pynmih paidbah khnang ba kan ym buh ïa ka jingim jongki ha ka jingma. Ki don ruh ki kyrteng jong ki briew kiba lyngba ka jingai jingtip jongki la lah ban pynïaid shakhmat ïa ka jingtohkit. Kumta lada paw kyrteng ïa ki ruh kan buh ha ka jingma bad na ka bynta ka jingbha la buhrieh ïaki kyrteng jongki” ong u Myntri Rangbah.
U Myntri Rangbah u la ïathuh ruh ba ki dang don ki jingtohkit jongki pulit ha kaba ïadei bad ka kam dawa pisa ruh. U la ïathuh khyndiat bnai shwa ban jia katei ka jingjia ha ka 13 tarik Nailar 2021 ki la don bun ki jingdawa pisa sha kiba bun ki riew shimet, ki nongkhaïi bad wat ki riew saiñ pyrthei ruh bad la maham tyngeh ruh lada kim siew ïa kaba la dawa.
U la ïathuh ba kane ka jingdawa pisa ka la sdang jah noh hadien ba la sdang ka jingïakren bad ka seng HNLC. Hooid ki dang don hi hangne hangtai tangba ki la duna bha ban ïa kaba mynshwa ong u myntri rangbah.
Nalor kata u la ïathuh “La jia ruh ki jingbthei bom IED ha ki bynta bapher bapher ka jylla kaba la buh ïa ka jingim briew ha ka jingma bad ka Commission bad kiwei kiwei ki jingtohkit ki la lap shai ïa ka jingïadonkti jong utei u nongïalam ka HNLC uba la khlad noh. La lap ruh da ka jingtohkit ba ka don ka jingpynkhreh ban pynbthei bom IED hapdeng 24 bad 48 kynta hapdeng kane ka nongbah Shillong hadien ka jingjia ha Laitumkhrah kumta ha katei ka miet ha ka por ba la ïakren bad ïa phylliew kumno ban ïada ban lait na kino kino ki jingmynsaw jong ki briew. Kumta ki pulit ki la hap ban leh kloi kloi namar lada kim leh lehse ka jingbthei bom IED ka lah ban jia ha Police Bazar ne ha Iewduh namar ka jingthmu ka long ban pynbthei ha ki jaka ba bun briew”.
Hooid u la ong ba ki pulit ophisar ki dei kiba la dep pyntbit hynrei ha kiba kum kitei ki jingkhynra pat kin don bun ki jingkulmar jignmut. “ Kin don ki jingban khia ,jingkulmar jingmut, jingkhuslai jingmut ïoh lehse ïa u bom la dep buh hangno re hangno bad kaei kaba lah ban jia. Kumta hapdeng kiba kum kitei ki khep bad hapdeng ka jinglyngkot ka por bad ym tip kaei kaba lah ban jia lehse jia pynban kine kiei kiei baroh. Hooid ka long kaba shisha la dep pyntbit bha ïa ki pulit ophisar ha kane ka liang, ki la ïa pynkhreh bha hi ruh ban pyndep ïa ka jingkhynra kumba la thmu ban kem im beit ïa u hynrei ka jia pat da kumne. Ki paidbah ki dei ban sngewthuh ruh ba kaei kaba ki pulit ki pyrshang ban leh hakum katei ka por ka long ban ïada ïa ki paidbah na kino kino ki jingiap bad jingmynsaw namar katei ka jingbyrngem pynbthei bom ka dei ha ki jaka paidbah”.
