Kynthoh u Dr. Mukul ïa ka jingshah siat ïap u Bah Cherish: “Hato ka dei ka jingïasylla?”

Shillong, Nailur, 09: U nongïalam ka Liang Pyrshah u Dr. Mukul Sangma u la buh jingkylli ïa ka Sorkar Meghalaya Democratic Alliance (MDA), halor ka jingshah siat ïap u Bah Cherishtarfield Thangkiew, “hato ka dei ka jingïasylla.”
Ha ka jingïakren bad ki lad pathai khubor da kaba kdew katkum ka kaiphod tohkit jong u Nongbishar T. Vaiphei kaba la wanrah ha ka sngi sdang jong ka Dorbar Synrai ka Iingdorbar Thawaiñ ka Jylla ha ka sngi Thohdieng u Dr. Mukul u la ong, “haba bishar ïa kane ka kaiphod, ki don ar tylli kiei kiei. Ka kaiphod ka kdew ba ka don ka jingleh bakla khlem jingkitkhlieh bad khlem da pyrkhat haba pyndonkam ïa ka iktiar.”
U la ong ba ka jingleit khynra jong ki Pulit ka dei ban long kaba da pyrkhat bha khnang ban lait na kano kano ka jingjia ba sngewsih, ban lait na ka jingduhei ka mynsiem briew la ka long na ki bahaing hasem lane na ka liang jong ki Pulit.
“Katkum ka rukom, ki Pulit ki dei ban kerkut ïa kato ka jaka. Hynrei ha kane ka jingjia, ïa ka ing la ker kur da ki Pulit, katkum kaba paw ha ka kaidphod,” u la ong.
“Ki (Pulit) la dei ban ap haduh ban da shai ka bneng khnang ba kin dup lah ban ïohi. Katkum ka Standard Operating Procedures (SOP) la ju bud ryntih ha ka jylla baroh kawei. Namarkata, ki la dei ban ap sa kumba shi kynta lane ar kynta. Hynrei balei kim (Pulit) shym la bud ïa ki kyndon,?” la buh jingkylli u Dr. Mukul.
“Ki dei ki briew kiba la ïoh jinghikai pyntbit. Ngi sngew sarong ïa ka jingtbit jong ka tnat Pulit. Hynrei ngam don daw da kumwei pat ban ngeit ba ka dei tang namar ka jingbym lah,” u la ong.
“Nga buh jingkylli ïa ka Sorkar, kum ki paidbah ruh ki dei ban buh jingkylli, hato kane ka dei ka jingïasylla? Kata ka dei ka jingkylli ïa ka Sorkar ba ka dei ban ai jubab sha u paidbah,” la bynrap u Dr. Mukul.
Haba pynpaw ba ka tnat syntiat jong ki Pulit ka Jylla Meghalaya ka dei kaba khlaiñ, hynrei ha kaba ïadei bad kane ka jingjia, u Dr. Mukul u la kynthoh da kaba ong, “lada ki Pulit ki la ïoh jingtip ba u (Bah Cheris) u don hapoh ingsah lajong bad ka lok bad ki khun ki kti, hato phi khmihlynti ba ka tnat Pulit kan ym tip hato ki don ne kim don ki dkhot ka seng (HNLC). “
“Nga kyntu ïa ki paidbah nongshong shnong jong ka Jylla ban buh jingkylli hato ka dei ka jingïasylla kaba lam ïa ka jingïap bad namarkata dei ban thung da ka jingtohkit kaba laitluid ban ïoh ïa ka jubab kaba shai,’ u la ong.
“Ki don bun tylli ki Agency tohkit kum ka NIA bad ka CBI kiba lah tohkit laitluid,” la ong u Dr. Mukul.
U la ong ruh ba kum kine ki jingjia, ki paidbah kin duh noh ïa ka jingshahniah ha ka Sorkar bad ha ka tnat Pulit. “Ka dei ka jingshahniah jong ki paidbah ïa ka synshar ka khadar kaba pynim ïa ka synshar paidbah jong ngi,” u la bynrap.
U la ong ruh namarba kane ka jingjia ka dei kaba lam sha u pud ka jingïap briew, ka Sorkar kam lah satia ban pynpaw paidbah ïa ki kyrteng jong ki briew.
“Kane ka jingjia ka pynlong ïa ngi ban buh jingkylli, hato ka Sorkar ka phah kem ne ka phah pynïap (ïa u Bah Cheris),” u la buh jingkylli.
“Lada kwah ban kem ïa u, ki la dei ban pynthikna ban pynthikna ba um dei ban shah pynïap. Ban kem ïa u briew kum u Bah Cheris ka long kaba kongsan bha hynrei ban siat ïap ka pynduh pyndam ïa ki tyllong jingtip bad ki sakhi sabut namarba kane ka ïadei bad ka shongsuk shongsaiñ ha ka jylla,” u la ong.