Khliehriat, Nailur, 09: Haduh 54 ngut ki khynnah skul jong ka Khliehriat Higher Secondary School, kiba la poi Hospital hadien ba ki la dih ïa u dawai IFA-Blue (dried Ferrous sulphate & Folic Acid tablet) ba la ai da ka tnat ka Koit ka Khiah jong ka Sorkar Jylla. Na kine ki 54 ngut, 8 ngut ki dei kiba la kham shitom jur bad kiba la hap ban thiah hapoh hospital (IPD) ha Khliehriat CHC, katba kiwei pat ki la shu shitom malu mala bad la ïalam ïa ki sha hospital ban leh ïa ka Medical Check-up.
U Principal jong ka Khliehriat Higher Secondary School, u Brother Solomon Swer, u la ïathuh ba mynta ka sngi ka dei ka sngi ban ai dawai ïa ki khynnah skul kumta ki nonghikai ki la sdang ban ai ïa ki dawai sha ki khynnah skul hynrei don ki nonghikai kiba la wan ïathuh ïa u ba ki dawai ki la sniew bad mar mar u Principal u la phah sangeh noh ban ai ïa ki dawai sha ki khynnah.
“Jin lada nga la ïoh jingtip kham slem imat ka la ktah ïa baroh ki khynnah ha skul,” ula ong.
Tang hadien kane ka jingjia, ki khynnah skul ki la ïalum shi jaka kat haduh ba la wanrah ïa ka huri hura kaba jur bha hapoh skul.
“Donbok ba ngi don ka jaka buh soh jew, kumta ngi la pynbam noh marmar da u soh jew ïa ki khynnah. Kiba bun kim da leilei than tangba ngi la phah sha Hospital tang shu leh ïa ka Medical Check-up” ong u Brother Solomon.
Ha kajuh ka por u Principal u la ïathuh ba hapoh skul kam don ka jaka kaba biang ban buh ïa ki dawai bad nangne shakhmat u la ong ba un ym treh shuh ban buh shibun ki dawai namarba kam biang ka jaka buh. U la ong ruh ba u dawai u dei uba la sniew watla ka tarik ne ka por kumba thoh ka dang biang tangba ym lah ban shaniah.
Ha ka jingïakren bad u Sub Divisional Medical and Health Officer ka East Jaiñtia Hills District, u Dr W.Baom u la ong, “ ngi la ai ïa kine ki dawai IFA- Blue sha ki skul ba kin ïa ki khynnnah skul namar kine ki dawai la mang na ka bynta ban pynbun ïa ka snam ha ka met khang ban ïada ïa ki khynnah na ka jingduna snam. Ïa kine ki dawai ngi la ai sha baroh ki skul naduh u snem 2012 kumba la bthah da ka Sorkar bad ngi ïoh ruh na ka sorkar Jylla bad la bthah ruh ban ai ïa kine ki dawai sha ki khynnah kiba naduh 10 snem haduh 19 snem ka rta, kata naduh Class-VI haduh Class-XII.
U Dr. Bamon, u la ong shuh shuh ba kine ki 54 ngut ki khynnah kiba la ïohpang ki dei kiba la ju dih teng ïa kine ki dawai ha kaba kim ju lei lei, hynrei ha kane ka kynti ba mynta pat ki khynnah ki la kem shitom bad ka dak ka shin jong ka jingshitom ka long ka Gastrict, ka jingkynroi prie, ka jingkthah khlieh bad jingkem tlot.
Tang shu ïoh jingtip, na ka liang ki nongtrei jong tnat ka Koit ka Khiah ki la leit shaw ïa ki khynnah bad pynkit ïa ki sha hospital ban leh ïa ka Medical Checkup.
