Shillong, Nailur 09: Ka ïingdorbar Thawaiñ jong ka jylla mynta ka sngi, ka la kynmaw burom ïa ki 5 ngut ki MLA jong ka jylla kiba la khlad noh.
Kine ki long u Bah JD Rymbai, MLA Jirang uba long ruh u Myntri Rangbah barim ka jylla. U Bah RG Lyngdoh, MLA ka Laitumkhrah uba long ruh u Myntri barim ka sorkar jylla. Nangta u Bah Robert Kharshiing, MLA ka Laitumkhrah bad MP ka Rajya Sabha. U Bah Sing Mulieh, MLA ka Jowai bad Myntri barim ka sorkar jylla. Uwei pat udei u A. Marak, MLA na Garo Hills.
Nangta la kynmaw burom ruh ïa kiwei kiwei de ki nongmihkhmat na kiwei pat ki jylla jong ka ri India, kynthup ïa ki MLA bad ki MP.
U Myntri Rangbah, u Conrad Sangma, u Nongïalam ka Liang Pyrshah, u Dr. Mukul Sangma, u Shongknor ka ïingdorbar, u Bah Metbah Lyngdoh bad bun kiwei pat ki dkhot ki la pynkynmaw ïa u synñiang ba kine ki nongmihkhmat ki la ai sha ka imlang sahlang bad sha ka jylla hi baroh kawei ha ka por ba ki dang long kum ki Nongmihkhmat. La pynlong ruh ïa ka jingsngap jar ba shimit kum ka dak ka jingkynmaw burom ïa ki.
