Takraiñ ka HYC ïa u Dr. WR Kharlukhi: Ka khyndew ka shyiap kam dei ka nongkynti jong ka NPP

Shillong, Nailur, 09: Ka jingkren jong u State President ka NPP Meghalaya State Unit u Dr W. Kharlukhi uba long ruh u MP jong ka Rajya Sabha ba kita “ki bym hun ïa ka jingpynbeit pud ym donkam ban thep shuh ka vote sha ka NPP” ka long ka jingkren jong u riewkyreit, u riewbiej bad ka pynpaw ba ka seng NPP ka kheiñ dewthala bad pynpaw shai ba kam don jingkitkhlieh ïa ka khyndew ka shyiap jong ki Kima Khasi.
“U State President jong ka NPP u dei ban kynmaw ba ka khyndew ka shyiap ha rilum Khasi Jaintua kam dei ka nongkynti jong ka NPP ne jong kino kino ki Seng Saiñpyrthei ba kin ïadie duh bad lilam katba mon sha Assam. U dei uei uta u Conrad Sangma ba un nud ban kheiñ dewthala ïa ka Regional Committee kaba la khlieh da u Bah Renikton bad u Bah Prestone. Hato kham tip bha u Conrad Sangma ban ïa u Bah Renik lane u Bah Prestone kiba la leit da la ka jong ka met shaduh ki shnong ban sngap bad lum jingtip ïa ka jinglong jingman ki jaka bad na ki nongshong shnong,” la ong u kyrwoh ba la phah da u General Secretary ka HYC u Bah Roy Kupar Synrem.
“Kum ka Seng ngi kren da kaba shai ba ki elekshon kin leit bad kin wan bad ki party ruh kumjuh ki duh kin dam bad kin mih hynrei ka khyndew ki Hima Khasi wei la duh la eh pat ban ïoh. Kaba donkam mynta ka long kumno ban ïakren ban ïoh pat ïa ka 18 sq km ka khyndew ba lah duh ha ka wat ïapynbeit pud kaba nyngkong ym ban ïa kren thep Vote hano,” la ong ka seng.
“Ngi kyntu ïa u State President jong ka NPP Meghalaya ban sangeh ka jingpyrshang jong u ban pynpait ïa ka jaidbynriew lyngba kane ka mat pynbeit pud. U ladei ban ïohi ïa ki dak ki shin ba ki Hima Khasi, ki briew kiba shong basah ha ki khappud ki don ha ka lynga ka pisa namar ka jingbymhun ïa ka rukom pynbeit pud bad ka jingsoi u Conrad Sangma ïa ka Memorandum of Understanding (MoU) khlem da kynjoh ktien ïa ki Hima Khasi, kiba long ki trai jaka bad ruh ïa ki District Council. Kum u nongïalam bad u nongmihkhmat u la dei ban kren ïa u Conrad Sangma ban khmih bniah bad pynbeit ïa ki tam ki duna ha ka MoU,” la kynthoh ka Seng.
“Kumba ka paw mynta imat ka NPP ka la sngewthuh ba ka lah leh bakla shaba palat ha kane ka wat kaba nyngkong bad ka sdang sa ban pynpharia ïa ka jaidbynriew lyngba kane ka mat pynbeit khappud bad kane ka long kaei kaei kaba i biej bad i poh haduh katta katta. Ka pynpaw ruh ba ha ka jaka ban ai mynsiem ïa ki nongshong shnong ha thaiñ khappud bad ïa ki Hima Khasi kiba lah shah ktah, ka NPP ka kheiñ dewthala bad i bein ïa ki baroh,” la ong ka Seng.
“Lada don kiba ong ba ki kmen ba ki Hima Khasi ki la duhei ka jaka kumba 18 sq km, ngi kyntu ba kin mih sha madan bad pyni da ki kam bad sngewbha ai noh shuwa ka khyndew lajong sha kiwei lane kino kino ki jingdon jingem jong phi ha kiwei bad lada phim pat nud ba leh kumta nai kren kulmar bad kren eiei halor kane ka mat bakongsan tam jong ka khyndew ka shyiap ka jaidbynriew,” la takraiñ ka HYC.