Shillong, Nailur 9 : U Myntri Rangbah ka jylla u Conrad K Sangma ula kren shai mynta ka Sngi Thohdieng ba ka jingpynbna jongka sorkar halor ka Criminal of Procedure Code (CrPC) bad Civil Procedure Code (CPC) da lei lei kan ym ktah ïa kino kino ki riti ki dustur kiba la ohshrong ha ka Riti Synshar ka ri India namar kine kim lah ban long halor ïa kiei kiba ka Riti Synshar ka ri India ka la pynkup bor ban don ki ïing Bishar kat kum ka Sixth Schedule.
“Ka Riti Synshar jongka ri ka long halor ïa ki aiñ ba la thaw da ka sorkar jylla. Ka Riti Synshar ka ri ka la kren shai kdar ha ka Para 4 bad 5 ba u Lat ka jylla u don ka bor ban thung ïa ki Nongbishar ha ki District Council bad ym don kino kino ki jingpynbna jongka sorkar jylla kiba lah ban ktah ïaka bor bad iktiar jongki” ong u Myntri Rangbah.
Kane ka jingkren jong u Myntri Rangbah ka long shisngi hadien ba ka KHADC ka la rai ban pyrshah ïa ka rai jongka Kynhun Myntri ban pyntreikam ïa ka CrPC bad CPC ha baroh kawei ka jylla.
Ka KHADC ka dawa ba ka sorkar ka dei ban tynsat noh ïa ka kyntien “ Laitnoh ki ïing bishar kiba la pynkup bor da ka Riti Synshar ka ri India kat kum ka Sixth Schedule” ha ka jingpynbna jongka.
U Myntri Rangbah u la pynshai ba ïa ki ïing bishar District Council la dep pyllait lypa na ka jingpynbna ba la pynmih da ka sorkar. “ Ym donkam ban tynsat ïa ka kyntien lait noh ne pyllait namar ka Riti Synshar ka ri ka la aibor lypa ïaki ïing bishar District Council bad ym dei ban don kano kano ka jingkhuslai ne jingartatien namar ka jingpynmih ïaka jingpynbna ka long tang ban ai bor ïaki Judicial Magistrate ha oki District Session Court bad kan ym don kano kano ka jingktah ha ki District Council Court” ong u Myntri Rangbah.
Haba la kylli shuh shuh u Myntri Rangbah ula ong “ Ki kwah ba ka jingpynbna kan long kaba shai kdar khnang ba lashai la shisngi yn ym don ba lah ban pyndonkam kulmar ïa kane ka notification bad sdang ban mushlia sa sha ki District Council Court. Hynrei kaei kaba nga kwah ban pynshai ka long ba ïa ka notification lah ban pynkylla ïa ki kyntien na ka por sha ka por hynrei kaba kyrpang ka long ba ka Riti Synshar ka ri ka la ai bor kyrpang ïa ki kat kum ka Sixth Schedule namar ka Para 4 bad 5 kala dep kren shai ïa kane kumta kan ym lah long da lei lei ruh ba kawei ka notification na ka sorkar Meghalaya kan pynkylla ïa ka jingpynkup bor ka Riti Synshar ka ri tangba sa shisien nga kwah ban pynshai ba kane ka notification kan ym lah ban tuklar bad kan ym ktah ïa ki ïing bishar District Council”.
U la ong “ Lada lashai la shisngi ka don kano kano ka jingïa tyngkhuh ne jingkulmar jingmut ki mih ka kano kano ka bynta nga ngeit skhem ba ki district council kin leit beit sha ki ïing bishar bad namar ka para 4 bad 5 jongka Sixth Schedule kala dep kdew shai ïa ka bor bad iktiar jong ki ïing bishar District Council. Nga ngeit skhem ba ym don ba lah ban tuklar ne mushlia ïa ki bor bad iktiar jong ki ïing bishar district council namar kin treikam kumba ki treikam naduh mynshwa haduh mynta”.
