Nongpoh, Nailur 06: Uwei u Rangbah na ka Shnong Pahamsyiem u la jah na la ïing naduh ka 31 tarik u Nailar 2022 khlem wan phai ïing shuh naduh katei ka sngi bad kane ka jingjah utei u rangbah ka la pynkular ïa kiba haïing hasem ha kaba haduh mynta kim shym la ioh jingtip shaei u leit ne u la jah.
Une u Rangbah uba la jah na la ing la tip kyrteng kum u Banshan Khongjoh ha kaba la ju khot ruh ïa u kum u Bah Mol bad u dei ruh u Rangbah uba don ka jingduna ha ka bor pyrkhat pyrdaiñ.
Kumba la ïathuh da kiba haing hasem jong utei u rangbah, la ong ba na ka liang ka ing ka sem ki la pyrshang ban wad jingtip shaei u leit u wan lane u la jah, hynrei kumba long haduh mynta kim shym la ioh jingtip shano u la poi bad kane ka la pynjynjar ïa ka ing ka sem ba kim tip satia shano u la poi lane u la leit.
Ki la ïathuh ruh ba naduh katei ka sngi kaba u la mih na la ing, utei u rangbah u phong ïa ka patlun rong ktieh bad ka sopti ba thohlain rong iong bad na ka liang kiba haing ki kyrpad ïa ki paidbah ba lada ki don jingtip lane lap ïa une u rangbah kin sngewbha ban pyntip lem sha ki nongïalam shnong ne sha ki ba haing hasem jongu.
