Jowai, Nailur 05: Ka jingsniew shaba palat jong ki surok kiba don ha kylleng ki thaiñ nongkyndong kaba buh pynban ha ka jingeh ïa leit ka wan jong ki paidbah nongshong shnong kiba hap hapoh ka West Jaiñtia Hills District, kine ki shnong kiba shah ktah ki kynthup hapoh ka 4-Mawkaiaw Constituency, ka 3-Raliang Constituency bad ka 1-Nartiang Constituency.
Katkum ka khubor ba la phah da ki nongïalam shnong kata u Waheh Shong ka Shilliang Myntang ma Beristar Lamare, Waheh Shnong ka Thadialong ma Wipi Situng bad u Waheh Shnong ka Thadsning ma Khiat Litep kila pynpaw sha ka sorkar ba ki shnong kiba shah ktah eh ki long ka Shilliang Myntang, Thangraiñ, Khliehsaniriang, Bhain, Thadsning, Samatan, Thadialong, Lummuriap, Mobandu, Lathymphu, Umsalang, Musiaw, Thadbamon, Sookhlieh ki dei ki shnong kiba hap hapoh ka 4-Mawkaiaw Constituency Assembly.
Kumjuh ïa ka shnong Mynkrem, Khliehriat, Saphohwaïong, longsnieh, Madansynrang kiba ha hapoh ka 1-Nartiang Constituency Assembly bad kumjuh ka shnong Nongjngi kaba hap hapoh ka 3-Raliang Constituency Assembly kiba la pynpaw ka jingsngewkhia bad suhsat haduh katta katta namar ba ka Sorkar kala ïehbeiñ ïa u surok da ki phew snem wat haduh mynta khlem da don shuh ka jingmaramot ne shna thymmai.
Kumta ïa une u surok la dep ban siang rong tang shisien ha ka por ba long MLA bad kum u Minister PWD jong ka Sorkar Jylla kata u (L) Kyrmen Susngi hynrei haduh mynta ïa u ne u surok ym shym la ïoh wat tang shisien ruh ïa ka jingmaramot (repairing). Kum ki nongshong shnong kiba shong basah ha kane ka dong ka thaiñ kila mad shibun ki jingeh jingshitom ha ka leit ka wan ka kit ka bah namar ka jingsniew palat pud jong u ne u surok ba dap tang ki thliew ki krem naduh na ka shnong Shilliang Myntang kaba jngai 23 Km haduh ban da poi ha ka shnong Nartiang u surok u ba pynïasoh shaduh ka shnong Khanduli. Shuh shuh halor kane kum ki nongshong shnong ki dap da ka jingdiaw mynsiem ba ka Sorkar ka khlem phai khmat shuh sha une u surok namar lyngba une u surok ba la pynïasoh bun tylli ki shnong ban poi sha Hospital (PHC) kaba don ha ka shnong Nartiang kham tam eh ïa ki longkmie kiba armet ban leit shah sumar bad kumjuh ïa kiba leit shim dawai na ki jaka sumar.
Kane ka jingsniew u surok kaba buh jingeh ïa ki paitbah kiba leit donkam sha Police Station kaba don ha shnong Nartiang haba ïadei bad ki kam jong ka aiñ, bad nalor kata ïa ki khynnah skul kiba leit pule ha ki skul kiba don ha ka shnong Nartiang, Ummulong, Jowai wat shaduh ka Nongbah Shillong bad kiwei kiwei ki jaka kiba hap ban ïaid lyngba une u surok.
Ym tang katta hynrei wat ïa ki nongrep kiba leit siew leit tda ban kit ïa ki mar rep jong ki kum u sying, u synrai, u synsar bad kiwei kiwei ki mar rep wat ban poi ha ka ïew kaba don ha ka shnong Nartiang wat ban poi shaduh ka ïew Pynsing kaba doh ha ka shnong Wahiajer, Ummulong kum kawei na ki ïew kaba heh tam hapoh Ri-Lum Jaiñtia.
Halor kane ka jingeh ba ki paitbah jong kitei ki shnong ki ïa kynduh ban ïaid lynti na utei u surok, kila dawa jur bad kyrpad ïa ka sorkar ba kan phai khmat sha une u surok uba la jot rathai khlem da don shuh ki nongpeit nongïarap, kila pynsngew ruh ba kum ki paitbah jong kane ka thain ki don ka hok ban ïoh ïa u surok uba bha kumba ïoh lem kiwei ki nongshong shnong jong ka jylla, la pynkut katei ka kyrwoh ba la phah.
