Naba jyrsieh palat ka surok, kynduh jingeh ki paidbah ha ka leit ka wan ha ka thaiñ Saipung

Khliehriat, Nailur 04 :Ki shnong kiba don ha ka thaiñ Saipung, East Jaiñtia Hills District ka dei kawei na ki thaiñ kaba ju ïakynduh jingeh haduh katta katta ha kaba ïadei bad la leit ka wan, na ka daw ka jingsniew bad jingjyrsieh palat ka surok kaba la shu dap tang ka khyndew ktieh kaba buh jingeh ruh ïa ki kali kiba ju kamai sha kitei ki thaiñ.
Lah ban kynthoh ruh ba na ka daw ka jingbymbit bym biang ka surok, ki lynti syngkien ka wanrah shibun ki jingeh ha kaba ïadei bad ka roi ka kiew ha ka thaiñ Saipung, ka dei ka thaiñ kaba la shah iehnoh beiñ ha ki nongmihkhmat bad kumjuh ruh ha ka sorkar, ki bym shym la don kata ka jingkitkhlieh ban shim khia ïa ki jingeh ki paidbah ka thaiñ.
Shuh shuh, lah ban pynpaw ba ka thaiñ Saipung ka dei ka jaka kaba don shibun ki nongshong shnong kiba don ka sap ban thaiñ jaiñ, kumjuh ruh ka dei ka jaka kaba biang bha ban pynshlur ïa paidbah ïa ka kam thain jain lane ka Hanloom, kumjuh ruh ka rep ka riang hynrei halor kine kiei kiei baroh ki paidbah ka thaiñ ki pynpaw tang ka jingduh jingkyrmen bad tang ka kut lad na ka daw ka jingshah iehnoh beiñ ha ki nongmih khmat bad ha ka sorkar.
Tang shu hap slap bad khamtam eh ha ka por lyiur, ki surok, ki lynti ki syngkien ha katei ka thaiñ ki la dap da ka jyrsieh, ki nongshong shnong jong ka thaiñ ki pynpaw ka jingsngew khia kaba khraw ha kaba bunsien ki duh noh ban leit pyndep ïa ki kam ki jam ba ki dei ban pyndep, ym tang katta, ki pynpaw ruh ka jingsngewsih ba kane ka jingsniew bad jingjyrsieh palat ka surok ka buh jingeh khamtam ïa kito kiba pang ba shitom kiba donkam ban leit phah sumar bad leit shim dawai sha Khliehriat, sha Jowai, ki kali kiba kit ïa ki briew bad kiba kit ïa ki mar ki mata bad kit ïa ki mar rep bunsien ki sahkut noh ha ka jyrsieh kaba jur bad wat hapdeng ka jingther jur u slap ki hap ban mih ban niat ïa ka kali ban lait na ka jyrsieh.
Katkum ka jingiathuh ki nongshongshnong, ki ïathuh shuh shuh ba ka jingbym biang ki lynti ki syngkien ka buh jingeh ruh ïa ki khynnah skul ha kaba bunsien haba jur u slap ki khynnah ki hap ban pep skul noh na ka daw ba kim lait shuh ban ïaid na ki lynti kiba dap tang ka jyrsieh.
Watla na ka liang ki waheh Shnong jong ki shnong kiba don ha ka thaiñ Saipung ba kynthup ruh ka Saipung Sidarship, na ka por sha ka por ki la leit ban buh jingthoh ha ka ophis PWD kaba dei ka tnat ba dei peit bad ki la ju pynpaw ruh ki jingeh jongki ba ki ju iakynduh ha ka leit ka wan, kane ka dei ruh kaei kaei kaba wat u nongmihkhmat ka thaiñ, u bah Shitlang Pale, MLA Sutnga Saipung Constituency u tip bha ïa kane ka jingeh ki paidbah, hynrei imat ka jing ud jing kyrpad bad jing pynsngew ki paidbah ka thaiñ kam poi shano shano ruh, ki hap ban shu im ka jingim kaba kordit kaba khanglad wat ïa ka roi ka pa ha ka thaiñ ruh.