Nongpoh, Nailur 04: Ha kane ka jingrakhe ïa ka sngi kyrpang ha ka jylla bad ka ri India hi baroh kawei ban ai burom ïa u synñiang u bynhei ba ki nonghikai ki la noh synñiang ban kyntiew ïa ka jingnang jingstad bad ka pule ka puthi, u MLA ka Jirang Constituency, u Bah Sosthenes Sohtun shuwa ban rakhe ïa kane ka sngi kyrpang ki nonghikai u la ai ka jingkhublei ba kyrpang ïa baroh ki nonghikai ha ka District bad ka jylla ba kin rakhe ïa kane ka sngi da ka mynsiem jong ka jingkmen bad ka jingkyrmen ba kin dang lah shuh shuh ban trei kham bha ban saindur ïa ka jylla bad ka ri.
Kum ban pynkynmaw, ha ka jylla bad ka ri India hi baroh kawei la ju rakhe man la u snem ha ka 5 tarik u Nailur kum kata ka sngi kyrpang jong ki nonghikai bad kane ka jingrakhe ka long ruh shi bynta ban kynmaw burom ïa ka sngi kha u President barim ka India, u Dr. Sarvepalli Radhakrishan, uba dei uwei na u riew khraw uba la noh synñiang ban kyntiew ïa ka pule ka puthi hapoh ka ri India.
Haba ïa kren bad u Mawphor, u MLA ka Jirang Constituency, u Bah Sosthenes Sohtun, u la ong kum u nongmihkhmat paidbah na Ri Bhoi u ka kwah ban ai ka jingkhublei kaba kyrpang ïa kane ka sngi kyrpang ki nonghikai bad u la sngewthuh ruh ba ki Nonghikai ki ïa kynduh shibun ki jingeh ha kaba ïa dei ban kyntiew ïa ka jingnang jingstad, hynrei kum kita ki nongsaindur ïa ka jylla bad ka ri kim shym la man thaid bad ki la trei shitom ban aiti ïa la ka jingim na ka bynta ban kyntiew ïa ka jingnang jingstad hapoh ka jylla bad ka ri hi baroh kawei.
U la ong ruh kum u Nongmihkhmat paidbah u kwah ban ai ka jingkhublei kyrpang ïa ki nonghikai na Ri Bhoi bad ha ka jylla hi baroh kawei bad ai ba kane ka jingrakhe ïa kane ka sngi kyrpang jongki kan long kaba phuh baphieng bad kajop bad kum ki nonghikai kin dang ioh mynsiem ban bteng ïa ka jingshakri ban ai jingnang jingstad ïa ki samla, namar haba kiew ka jingnang jingstad kan District bad ka jylla ruh kan dang kiew ha baroh ki liang, u la ong.
Shuh shuh, u la ong ruh ba kum ka ri bad ka jaid bynriew kan nym lah ban siew kylliang ïa u synñiang u bynhei ba la synñiang da ki Nonghikai bad dei ki nonghikai kiba la sain dur ba ka jylla bad ka ri kan kiew ha baroh ki laing bad namar kata kum ki nongshong shnong bad ki paidbah ka jylla ngin dang kitbok kitrwiang ïa baroh ki nonghikai hapoh ka jylla ba kin dang lah shuh shuh ban trei shitom ban dang kyntiew ïa la ka ri bad ka jaid bynriew wat la shibun kum ki nonghikai ki ïa kynduh jingeh ha kane ka kam kaba ki trei kumba la ju kren paidbah ba ki dei kita ki nongtei ïa ka ri bad ka jaid bynriew, u la bynrap.
