Harud surok sha NEIGRIHMS Hospital bret dusmon ïa ki khun sniang ba la ïap

Shillong, Nailur, 03: Khyndai tylli ki khun sniang ba la ïap bad ba la sma pyut ïa kiba la bret dusmon harud surok ha ka lynti ban leit sha NEIGRIHMS Hospital New Shillong da ki briew bym lah satia ban tip la lap da ki nongïaid lynti ha ka step Sngi Saitjaiñ.
Halor kane ka jingjia ki nongïaid lynti ki la pyntip sha u Bah Nicky u RJ jong ka 91.1 Radio Mirchi bad uba la pyntip pateng sha ki lad pathai khubor ban pynphriang ïa kane ka khubor kaba pynisaitmet.
Ki nongkitkam shnong jong ka shnong Mawkasiang Pyllun tang shu ïoh jingtip halor kane ka jingjia, ki la wan her mar mar sha kane ka jaka ban pynlong hi da lade ïa ka jingjurip ha kaba ki la pynpaw ruh ïa ka jingsngewkhia halor kane ka bret dusmon ïa kine ki khun sniang kiba la ïap bad ba la pyndait ruh ïa ka muhor (ear tag) ha ki skhor jong ki.
Ïa kine ki khun sniang la shimti noh da ki nongkitkam jong ka Dorbar Shnong Mawkasiang ban pynkhuid bad ban tep khnang ban lait na kano kano ka jingsaphriang ka jingpang kaba lah ban mih na kine ki symbai khun sniang ba la shu bret dusmon da ki briew.
Kum ban shu pynkynmaw hangne, dang ha ka sngi Baar mynta ka taiew, ka tnat Animal Husbandry and Veterinary (AH& Vety) ka Sorkar Jylla ka la sam ïa ki symbai khun sniang sha ki nongri sniang ha ka shnong Tynring bad sha ki shnong kiba marjan kum ka jingïarap ïa ki nongri jingri ban kyntiew ïa ka khih ka kamai jong ki.
U Rangbah Shnong jong ka Mawkasiang Pyllun, u Bah T. Kharkongor ha ka jingïakren ki lad pathai khubor u la pynrem jur ïa ki briew kiba donkti ban shu bret dusmon ïa kine ki khun sniang kiba la ïap bad ong ruh kum kine ki rukom leh bym don shuh ka jingkitkhlieh ka lah ban buh jingma ïa ki nongïaid nongieng bad ïa ki nongshong shnong kiba la lah ban ïabit jingpang lada dei ba kine ki khun sniang ki ïap na ka daw ba ki don kano kano ka jingpang.
U Symbud Myntri Rangbah ka Jylla u Bah Prestone Tynsong ha ka jingïakren bad ki lad pathai khubor u la ong, “ïa ka muhor (ear tag) ngi la pyndait bad ka don ka Control Room kaba peit ngor ïa kine ki sniang ba la aiti sha ki nongïoh jingmyntoi. Lada ki mut ban die ruh ngin lap, shano kin die bad shano u don uto u khun sniang bad lada u ïap ruh ngi la lap.”
“Halor kane ka jingïap jong ki symbai khun sniang kaba nga dang shu ïoh jingtip na ki lad pathai khubor ngan sa phah pynlong ïa ka jingtohkit,” ong u Bah Tynsong.
“Ïa mynta hi kane ka dang dei tang ka jingjia kaba nyngkong bad ngan sa kren ïa ka Director jong ka Animal Husbandry and Veterinary (AH& Vety) balei ka jia kumta. Namarba ngim pat tip ïa ka daw bad nga phah tohkit,” la ong shuh shuh u Bah Tynsong.
Katkum ka jingïathuh jong u Bah Tynsong, ïa kine ki symbai khun sniang kiba la wanrah na ka jylla West Bengal la pynsah kyrpang shwa ha ki Isolation Centre kumba 10-12 sngi eiei ha Upper Shillong bad ha Kyrdem Kulai. La sumar ïa ki da ki doktor bad nalor kata la ai dawai bad ai injekshon bad la peit thuh bha ïa ka jinglong ka met jong ki shwa ban sam pat sha ki nongri sniang.
Haba kylli, u Bah Tynsong u la ïathuh ba ïa mynta ka jingsam ïa ki symbai khun sniang ka dei kaba la sdang nyngkong eh na Mawryngkneng C&RD Block bad hadien kane yn sa bteng ïa ka jingsam sha kiwei pat ki C&RD Block ka jylla baroh kawei.
“Wat haba ngi sam ïa kine ki symbai khun sniang, ngi da bishar bniah bha ïa ki nongri sniang bad ïa kiba don jingmut shisha khnang ba kan long ka jingmyntoi ïa ka khih ka kamai jong ki hi,” u la ong.
U la ïathuh ba ha Phase-I ka Sorkar ka la buh thong ban sam haduh 16 hajar tylli ki sniang sha ki nongri sniang ha ka jylla baroh kawei.
Kawei ka C&RD Block kan ïoh kumba 400-500 tylli ki symbai khun sniang.