Sngewkmen ka Ri Bhoi Dorbar ba ai ksai u Myntri Rangbah ban urlong ka Patharkhmah Civil Sub Division

Nongpoh, Nailar 02: Ka Ri Bhoi Dorbar mynta ka sngi kala lum syndon da ka jingïalang ba kyrkieh ban pynpaw ïaka jingsngewkmen bad ai ka jingkhublei ba kyrpang ïa u Myntri Rangbah ka jylla u Conrad K Sangma halor ka jingdonkam ban ioh noh ïaka Patharkhmah Civil Sub-Division hadien ba u la kren shai ba ka Patharkhmah ka la dei hok ban ioh hadien ka jingïalang jong ka tnad Animal Husbandry and Veterinary Department haka sngi Balang ha Byrnihat.
Haba kren sha ki lad pathai khubor mynta ka sngi naka liang u Bah RB Shadap President ka Ri Bhoi Dorbar u la ong ba ka Patharkhmah Administrative Unit kala Don mynta kumba 33 snem bad kala dei ka por ba ih bha ban kyntiew kyrdan noh sha ka Civil Sub Division kumba ka Ri Bhoi Dorbar kala dawa mynta la bun phew snem bad wat ka jaka ruh la dep ban ai da ka shnong Patharkhmah naduh u snem 1998 naka bynta ban shna ïaki jaka treikam jong ka Civil Sub Division.
U la ong ruh ba ka Civil Sub Division ha Patharkhmah ka dei ka jingangnud bala slem jong ki paidbah lah bun phew snem kumba ka Dorbar hi kala ju dawa naduh ki por ba mynshuwa halor ka jingdonkam ban ioh noh ïaka Civil Sub Division, kaba ka Patharkhmah ka don ruh ïaka jingheh kumba 48 hajar hectare, bad ki don kumba 110 tylli ki shnong bad katkum ka khana samari jong u snem 2011 ki don kumba 35 hajar ngut ki nongshong shnong.
Kumta naka liang ka Dorbar ka kyrpad sha ka sorkar khamtam u Myntri rangbah ban pynkloi Ia katei ka Civil Sub Division naka bynta ka jingdonkam bad ka jingbit jingbiang jong ki paidbah bad kyrpad ruh ba katei ka jingkren jong u Myntri Rangbah kan long ka jingkyrkhu kaba khraw ïaki paidbah nongshong shnong ha katei ka thaiñ khamtam ban ïajan bad ki ophis sorkar.