Nongstoiñ, Nailur, 2: Watla ka aïom ba ki syntiew cherry ka dang shim por sa kumba shibnai kynthih, hynrei kawei ka kynhun jong ki samla na Nongstoiñ ka Oh Hai Marchnong kaba la ïalam da u bah G.J.L.Sangriang kum u President bad u samla F.Marweiñ Secretary bad u bah Josephas Thongni ryngkat bad kiwei kiwei ki dkhot jong ka kynhun, ki la pynkhreh shait shait ban pynlong ïa ka tamasa cherry blossom ha Nongstoiñ.
U bah G.J.L.Sangriang President ryngkat kitei ki nongïalam haba ïakren bad ki lad pathai khubor ha ka sngi palei ka 1 tarik Nailur, u la ong ba ka jingthaw ïa katei ka kynhun ka long na ka bynta ban kyntiew ïa ka sap ka phong kaba ki para nongshong shnong hapoh ka District naduh ki khynnah, ki samla, bad ki rangbah ki don la ka long ha ka sap ïalehkai, ka rwai ka siaw, ka put ka tem ka suh ka thaiñ ka shna jingshna bad kiwei kiwei.
Nalor kata u la ong ba katei ka kynhun ka don ruh ïa ka thong ban pynsngewthuh ïa ki khynnah bad samla, ba kin kiar na ki kam ki bym ai jingmyntoi ha ka jingim jong ki, da kaba pynmlieh ha kiwei pat ki kam kum ki kam ïalehkai, ki kam thaiñ jingthaiñ, shna jingshna bad kiwei kiwei.
Haba kylli pat ba kiei ki jait tamasa kiba kham itynnad ne kiba kham khring ïa ki paitbah nongpeit kai kitei ki nongïalam ka kynhun ki la ong bha ki don bun jait ki tamasa kum ka jingïapynisap ha ka rwai ka siaw, ka put ka tem, nangta kan don ruh ka jingpyninam ïa ki tiar tynrai,bad kiwei kiwei ki bynta.
Ha kajuh ka por ki la ong ba hadum mynta kim pat lah ban pynbiang lut ïa ki jingdon kam baroh hynrei kin sa nang pyntip shuh shuh hadien ynda ki la dep pynbit pynbiang lut.
